“Təkcə yaxşı mahnı yazmaqla iş bitmir” —Məşhur bəstəkar “Avroviziya”dan DANIŞDI

Azərbaycanın “Avroviziya” mahnı yarışmasındakı uğursuz çıxışından sonra sosial şəbəkələrdə müxtəlif fikirlər səsləndirilir. Bir qisim bu müsabiqənin mənasız olduğunu, digər qisim isə müsabiqənin siyasi maraqlara xidmət etdiyini deyir. Azərbaycanın müsabiqədə uğursuz olmasını komandanın qeyri-peşəkarlığı ilə əlaqələndirənlər də mövcuddur.

Tanınmış bəstəkar Tərlan Məmmədhüseynov müsabiqə ilə bağlı fikirlərini Demokrat.az-la bölüşüb. Bəstəkar bildirib ki, “Avroviziya” müsabiqəsi ətrafında hər il müxtəlif fikirlər səsləndirilir, xüsusilə də uğursuzluq yaşandıqda:

“Şəxsən mən, bir bəstəkar və musiqiçi olaraq bu məsələyə bir qədər fərqli tərəfdən baxıram. "Avroviziya" bir musiqi yarışı deyil, o, həm də vizual təqdimat, strategiya, mədəniyyət diplomatiyası və kommunikasiya bacarığı tələb edən bir səhnədir. Təkcə yaxşı mahnı yazmaqla iş bitmir. Hər detala qədər düşünülmüş, həm musiqi, həm vizual, həm də psixoloji hazırlıq tələb edən bir prosesdir”.

Bəstəkar onu da qeyd edib ki, Azərbaycanın “Avroviziya” komandasının zəif olduğunu düşünmür:

“Mənim fikrim indiki komandanın işini tənqid etmək deyil. Əksinə, əminəm ki, onlar nəyi bacarıblarsa, onu da ortaya qoyublar və bu işə zaman, zəhmət sərf ediblər. Gördükləri işə hörmətlə yanaşıram və onların səmimi niyyətlə çalışdıqlarına inanıram. Uğursuzluqlar isə əksər hallarda sadəcə musiqi ilə deyil, bütöv yanaşmadakı boşluqlarla bağlı olur. “Avroviziya” bizə təkcə qalib olmaq üçün deyil, öz musiqimizi, kimliyimizi Avropaya göstərmək üçün bir fürsət verir. Əgər bu fürsətə ciddi və peşəkar yanaşsaq, bu səhnə hələ çox musiqiçimizin tanınmasına imkan aça bilər. Sadəcə, bu işi layihə deyil, missiya kimi görmək lazımdır”.

Cavidan Mirzəzadə
Demokrat.az

“Təkcə yaxşı mahnı yazmaqla iş bitmir” —Məşhur bəstəkar “Avroviziya”dan DANIŞDI

Hesaba daxil ol

Qeydiyyatdan keç

Şifrəni bərpa et