Şanxay Universitetinin alimləri müəyyən ediblər ki, hipertoniya və yüksək qan şəkəri kimi pis vərdişləri və metabolik pozğunluqları olan insanların beyni əhəmiyyətli dərəcədə daha tez qocalır.
HİT.az xəbər verir ki, tədqiqatın nəticələri "Research" elmi jurnalında dərc olunub.
Tədqiqatda Kailuan sakinlərinin klinik kohortunun 16 illik təqib məlumatlarından istifadə edilib. Tədqiqatçılar maqnit rezonans tomoqrafiyasından (MRT) istifadə edərək, qocalma ilə bağlı köhnəlmə və struktur dəyişikliklərin dərəcəsini əks etdirən beyin yaşını qiymətləndirdilər. Bu dəyişikliklərə toxuma atrofiyası, ağ maddənin strukturunun pozulması və onun patoloji siqnalları daxildir.
Alimlər MRT görüntülərini həyat tərzi və sağlamlıq vəziyyəti də daxil olmaqla müxtəlif risk faktorları ilə müqayisə ediblər. Məlum olub ki, beynin qocalması ilə ən yaxından əlaqəli olan şərtlər yüksək qan təzyiqi, yüksək qan şəkəri, hiperkreatinemiya (qanda yüksək kreatinin səviyyəsi), siqaret və aşağı təhsildir.
İştirakçıların risk faktorları nə qədər çox olsa, beyinlərinin xronoloji yaşı bioloji yaşlarından bir o qədər çox fərqlənir. Bu, xüsusilə dörd-beş əlverişsiz faktoru olan könüllülərdə aydın olub: insanın faktiki yaşı ilə beyin yaşı (beyin yaşı boşluğu, BAG) arasındakı fərq onlarda ən böyük idi. Bu, pis vərdişlərin və metabolik pozğunluqların birləşməsinin degenerativ prosesləri sürətləndirdiyini göstərir.
Əlavə təhlillər hipertoniyanın beyin yaşına ən çox təsir etdiyini göstərib. Yüksək qan təzyiqi olan insanlarda MRT-də qeydə alınan beyin yaşlanması əlamətləri xüsusilə qabarıq şəkildə özünü göstərir. Tədqiqatçıların fikrincə, bu, beyində yaşa bağlı dəyişiklikləri ləngitmək üçün ürək-damar və metabolik xəstəliklərin erkən profilaktikasının vacibliyini təsdiqləyir.
Samir
