Başqırdıstanın Salavat şəhərindəki Sveça parafin istehsalı zavodunda güclü partlayış baş verib.
NOCOMMENT.az bildirir ki, bu barədə TASS məlumat yayıb.
Video partlayışdan sonrakı anı əks etdirir. Kadrlarda zavoddan qara tüstü sütununun yüksəldiyi görünür.
TASS xəbər verir ki, Fövqəladə Hallar Nazirliyinin Baş İdarəsinin məlumatına görə, açıq atəş artıq söndürülüb.
REN TV-nin məlumatına görə, partlayış nəticəsində 4 nəfər xəsarət alıb.
Fövqəladə Hallar Nazirliyi üç nəfərin vəziyyətinin ağır olduğunu bildirib. Respublikanın Səhiyyə Nazirliyi TASS-a bildirib ki, iki qurban reanimasiyadadır.
Bundan əlavə, partlayış nəticəsində binanın qismən uçması barədə məlumatlar yayılıb. Dağıntılar altında bir nəfərin ola biləcəyi ehtimal edilir. Xilasedicilər onu axtarır.
Fövqəladə Hallar Nazirliyi partlayışın baş vermə şəraiti barədə danışıb. “İlkin məlumata görə, texnoloji prosesin pozulması nəticəsində istehsalat binasında soba avadanlığının təzyiqsizləşməsi, ardınca binanın dağılması və yanğın baş verib”, – məlumatda deyilir.
Respublika prokurorluğunun məlumatına görə , hadisənin ilkin səbəbi qaz-hava qarışığının partlaması və ardınca yanğın olub.
İdarənin saytında sənaye təhlükəsizliyi qanunvericiliyinə və əməyin mühafizəsi tələblərinə əməl olunması ilə bağlı yoxlama aparıldığı elan edilib. Hesabatda qeyd olunur ki, əsaslar olarsa, prokurorluq tərəfindən cavab tədbirlərinin görülməsi məsələsi həll olunacaq.
Bundan əlavə, prokurorluq bu faktla bağlı təşkil edilmiş istintaqa hazırlıq yoxlamasının gedişi və nəticələrini nəzarətdə saxlayır.
