Rusiya və Ukrayna mayın 16-da İstanbulda keçirilən danışıqlardan sonra yeni görüşlə bağlı razılığa gəlib.
KONKRET.az musavat.com-a istinadən xəbər verir ki, bunu Türkiyənin xarici işlər naziri Hakan Fidan X sosial şəbəkəsindəki paylaşımında qeyd edib.
“İntensiv diplomatik səylər sayəsində Rusiya və Ukrayna nümayəndə heyətləri Türkiyənin vasitəçiliyi ilə İstanbulda görüş keçirdilər. Tərəflər yeni görüşlə bağlı prinsipial razılığa gəliblər”, – H. Fidan bildirib.
O əmin edib ki, Türkiyə Rusiya və Ukrayna arasında davamlı sülhün təmin edilməsi üçün mümkün olan hər şeyi etməyə davam edəcək.
Qeyd edək ki, İstanbulda aparılan danışıqlarda tərəflər “1000-ə 1000” düsturuna əsasən hərbi əsirlərin dəyişdirilməsi barədə razılığa gəliblər.
Rusiya nümayəndə heyətinin rəhbəri Vladimir Medinski bildirib ki, Kiyev və Moskva atəşkəs rejiminin yaradılması ilə bağlı bir-birlərinə konkret təkliflər təqdim etməyə razılaşıblar. Onun sözlərinə görə, bundan sonra əlaqələr davam edəcək.
Medinski qeyd edib ki, Rusiya tərəfi nəticədən razıdır və əlaqələri davam etdirməyə hazırdır.
