BAKI,TurkicWorld
Körpələrin ilk addımlarını 9 ilə 15 ay arasında atması təkcə qidalanma, hərəkət imkanları və doğum şəraiti ilə deyil, eyni zamanda genetik faktorlarla da sıx əlaqəlidir.
Bu qənaət Böyük Britaniyanın Surrey Universitetinin aparıcı alimləri tərəfindən Nature Human Behaviour jurnalında dərc olunan genişmiqyaslı tədqiqat nəticəsində əldə edilib.
Norveç, Niderland və Böyük Britaniyadan təxminən 71 min uşağın məlumatlarının təhlili əsasında aparılan araşdırma göstərib ki, körpələrin müstəqil yeriməyə başlamasında müşahidə olunan fərqlərin təxminən 25 faizi 11 əsas genetik göstərici ilə izah oluna bilər. Bu genetik dəyişikliklər beynin ölçüsü, strukturu və idrak funksiyaları ilə əlaqəlidir.
Tədqiqatın müəlliflərindən biri olan professor Anjelika Ronald bildirib ki, valideynlər uşaqlarını dəstəkləyə bilər, lakin onların nə vaxt yeriməyə başlayacaqlarına tam nəzarət etmək mümkün deyil.
Araşdırmada həmçinin erkən yerimə ilə diqqət çatışmazlığı və hiperaktivlik sindromu (DEHB) arasında müəyyən genetik kəsişmələrin olduğu da aşkar edilib. Mütəxəssislər bu cür uşaqların daha aktiv olduqları üçün daha tez yerimə praktikasına başladığını ehtimal edirlər.
Bununla yanaşı, tədqiqatçılar gec yerimənin mütləq olaraq inkişaf ləngiməsi demək olmadığını bildirirlər.
Araşdırma qrupu gələcəkdə genetik faktorlarla ətraf mühitin qarşılıqlı təsirinin uşaq inkişafına necə yön verdiyini daha dərindən araşdırmağı planlaşdırır.
