Oman Yəmən husiləri ilə ABŞ arasında atəşkəs razılaşmasına vasitəçilik edib.
Oxuməni.az dünya mediasına istinadən xəbər verir ki, bu barədə çərşənbə axşamı Sultanlığın xarici işlər naziri Bədr bin Həməd bin Həmud əl-Busəidi məlumat verib.
“Gələcəkdə tərəflərdən heç biri digər tərəfə hücum etməyəcək, o cümlədən Qırmızı dənizdə və Bab əl-Məndəb boğazında Amerika gəmilərinə hücumlar, naviqasiya azadlığını və beynəlxalq ticarət gəmilərinin maneəsiz hərəkətini təmin edəcək”, - deyə məlumatda bildirilir.
Nazir həmçinin "konstruktiv" fəaliyyətinə görə hər iki tərəfə təşəkkür edib və ümidvar olduğunu bildirib ki, saziş regional məsələlərin həllində gələcək irəliləyişlərə yol açacaq və ədalətə, sülhə və hamı üçün firavanlığa nail olmağa töhfə verəcək.
Kanadanın baş naziri Mark Karni ilə görüşdən əvvəl ABŞ prezidenti Donald Tramp bazar ertəsi axşam husilərin ABŞ administrasiyasına “mübarizəni dayandırmaq istədiklərini” deməsindən sonra döyüşlərin dayandırılacağını deyib.
"Husilər... daha döyüşmək istəmədiklərini açıqladılar. Sadəcə döyüşmək istəmirlər", - Tramp deyib. "Biz buna hörmət edirik və bombardmanı dayandıracağıq... və onlar təslim oldular."
Husilərin Ali İnqilab Komitəsinin rəhbəri Məhəmməd Əli əl-Husi X sosial şəbəkəsindəki səhifəsində “ABŞ-ın Yəmənə qarşı təcavüzünün sonu”nun “ilk olaraq yerdə qiymətləndiriləcəyini” bildirib.
O qeyd edib ki, qrupun əməliyyatları "İsrail təcavüzünə son qoymaq və Qəzzaya humanitar yardımların daxil olmasını təmin etmək məqsədi ilə Qəzzaya dəstək olub və davam edir". ABŞ ilə əldə olunan atəşkəs razılaşması İsrailə qarşı hücumların dayandırılmasını nəzərdə tutmur.
Bu arada, hərəkatın siyasi şurasının rəhbəri Mehdi əl-Məşət üsyançıların nəzarətində olan “Əl-Məsirə” telekanalı tərəfindən yayımlanan bəyanatda bildirib ki, "nə bahasına olursa-olsun, Qəzzaya dəstəyimizdən əl çəkməyəcəyik. Baş verənlər yalnız zərbələrimizin ağrılı olduğunu və davam edəcəyini təsdiqləyir".
Husilərin siyasi bürosunun rəhbəri İsrail sakinlərinə “sığınacaq axtarmağı və ya dərhal vətənlərinə getməyi” tövsiyə edib. “Sizin uğursuz hökumətiniz artıq sizi qoruya bilməz” M. əl-Məşət əlavə edib.
Üsyançılarla ABŞ ordusu arasında gərginlik Vaşinqtonun Yəməndəki husilərin hədəflərinə martın 15-də İsrail və ABŞ hərbi gəmilərinə hücum etməkdən çəkindirmək üçün hava hücumlarını bərpa etdikdən sonra artıb.
Almaz Həsənli
