1-ci Liqanın 24-cü turunda liqada qalmaq uğrunda əsas rəqiblərindən olan "Difai"nin qonağı olan "Mingəçevir" 4:1 hesablı qələbə qazanaraq qarşısına qoyulan məqsədə çatmaq yolunda inamlı addım atdı. "Şəhərlilər"in baş məşqçisi Füzuli Məmmədovla əlaqə saxlayıb həm son oyun barədə fikirlərini öyrəndik, həm də qarşıdakı matçdan - artıq elitaya vəsiqəni təmin etmiş "İmişli" ilə dueldən nə gözlədiyini soruşduq.
Onun Fanat.Az-a açıqlaması belə oldu:
"Turnir cədvəlindən də görünür ki, liqanın turnir cədvəlinin aşağı pillələrində amansız mübarizə gedir. Matç ərəfəsində "Difai"dən 3 xal öndə olsaq da, mümkün xal itkisi gərginliyi artıra bilərdi. Bu oyunun önəmi bizim üçün çox böyük idi. Matçın nə dərəcədə önəmli olduğu, rəqibin zəif və güclü cəhətləri barədə həftə ərzində futbolçularımıza tam şəkildə məlumat vermişdik. Bizi gərgin mübarizə gözlədiyini bilirdik.
Rəqibin son üç oyunu təhlil olunmuşdu. Bundan başqa, altı-yeddi qarşılaşmalarını da izləmişdim. "Difai"nin sağ və sol cinahlarda sürətli oyunçuları olduğunu xəbərdar idik. Mərkəz hücumçularını uzun ötürmələr sayəsində topla təmin etməyə çalışacaqlarını və ya belə desək, hücumu cinahlara yayacaqlarını öyrənmişdik. Müdafiə planında isə son iki oyundakı kimi futbol sərgiləyəcəklərini ehtimal edirdik. Yəni ikinci zonada sıxlıq yaratmağa, rəqibin ötürmələrdə buraxdığı səhvlər zamanı topu ələ keçirməyə və sürətli keçidlər etməyə çalışan komanda olduqlarını bilirdik. Təhlillər zamanı Muhammed Alfa və Fərid Kərimizadə kimi sürətli futbolçuları nəzarətdə saxlamağın vacib olduğunu futbolçularımıza izah etmişdik. Rəqibin sürətli əks-həmlələr qurmasını əngəlləmək üçün təbii ki, top itkilərimiz mümkün qədər az olmalı idi. Top itkiləri zamanı oyunçularımız dərhal pressinq tətbiq etməli, "açılan" futbolçularımız isə vaxtında geri qayıdaraq vəziyyəti sığortalamalıydılar. Bir sözlə, onlara boşluqlar verməməliydik. "Difai"nin müdafiə və yarımmüdafiə xətləri arasında boşluqlar buraxacağını bilirdik.
Həfətboyu keçdiyimiz hazırlıqdan "Difai" ilə oyunda çox yaxşı faydalandıq. Oyunda hesabı açan tərəf biz olsaq da, fasilədən sonrakı ilk 15 dəqiqənin ağır alınacağı bəlli idi. İkinci hissədə verdiyim tapşırıq belə di ki, meydanın hər nöqtəsində istənilən top itkisindən sonra dərhal hər kəs öz zonasında pressinq etməli, rəqib futbolçuya düşünmək üçün vaxt verməməlidir. Komanda tapşırığın öhdəsindən tam şəkildə gəldi. Verilən tapşırıqları yüksək səviyyədə yerinə yetirdiklərinə görə komandama təşəkkür edirəm. Bu gün komandamın taktika anlayışı, fiziki durumu istədiklərimi meydanda ortaya qoymağa imkan verir və bu məqam məni çox sevindirir. Sağ olsunlar, meydandan bütün güclərini qoydular, inamla mübarizə apardılar. Təbii ki, bizi dəstəkləmək üçün Şamaxıya gələn azarkeşlərimiz də ən xoş sözlərə layiqdirlər.
Növbəti oyunumuz "İmişli"yə qarşıdır. Bu komanda ilə səfərdə üz-üzə gəlmişik (Oyun "Mingəçevir"in 1:0 hesablı qələbəsi ilə başa çatıb). Rəqibi təhlil edəcəyik. Öz azarkeşlərimizin dəsətəyi fonunda mübarizə aparcağıq. "İmişli" ilə oyunda da meydana qələbə üçün çıxacağıq".
Nihat
