Rusiyada müəyyən qüvvələr iki ölkə arasında münasibətləri pozmağa çalışır
Milli Məclisin deputatı Azər Badamov mayın 4-də Rusiyaya səfəri zamanı hava limanında saxlanılıb və onun bu ölkəyə girişinə qadağa qoyulduğu bildirilib. A.Badamov sonradan Azərbaycana qayıdıb.
Məsələ ilə bağlı Azərbaycan Xarici İşlər Nazirliyinin mətbuat katibi Ayxan Hacızadə Milli Məclisin üzvünün Rusiya ərazisinə buraxılmaması ilə bağlı yerli medianın sualını cavablandırarkən həqiqətən belə bir hadisənin baş verdiyini qeyd edib. Onun sözlərinə görə, Milli Məclisin deputatı Azər Badamovun daxil olduğu nümayəndə heyətinin Həştərxan şəhərinə səfəri məhz Rusiya Federasiyası Həştərxan vilayətinin vitse-qubernatoru - Hökumət sədri Denis Afanasyevin dəvəti əsasında Azərbaycan xalqının Ümummilli Lideri Heydər Əliyevin anadan olmasının 102-ci ildönümü münasibətilə keçiriləcək tədbirlərdə iştirak məqsədilə təşkil olunub.
Deputat Azər Badamova qarşı bu davranış qəbulolunmazdır
Nümayəndə heyəti Bakıdan Moskvaya uçmasına baxmayaraq, Rusiya tərəfi hər hansı bir ilkin xəbərdarlıq və ya məlumat vermədən heyətin tərkibində olan millət vəkili Azər Badamovu Moskvada hava limanında saxlayaraq, onun ölkəyə girişinə qadağa qoyulduğunu bildirib. O, bir müddət Moskva hava limanında gözlədildikdən sonra, ölkəmizə geri qaytarılıb.
Məsələ ilə əlaqədar, dərhal Rusiyadakı səfirliyimiz vasitəsilə Rusiya XİN-i ilə əlaqə saxlanılıb, Rusiya XİN-in rəsmisi məsələnin araşdırılacağını bildirərək, bu qərarın səbəbləri barədə izahat verməyib. “Rusiya tərəfinin verdiyi bu qərarı qeyri-dost addım hesab edir, məsələ ilə əlaqədar Rusiya tərəfindən tutarlı izahat veriləcəyini gözləyirik”, - deyə A.Hacızadə vurğulayıb.
Məlumdur ki, Azərbaycan Rusiya ilə əlaqələrin inkişafına böyük əhəmiyyət verir. 2022-ci ilin fevral ayında tərəflər arasında strateji müttəfiqlik haqqında sənədin imzalanması da bunun göstəricisidir. Həmçinin bugünlərdə Vladimir Putinin Azərbaycan Prezidenti İlham Əliyevə ünvanladığı təbrik məktubu da ölkələr arasında əlaqələrin inkişafının göstəricisidir. “Əminəm ki, Azərbaycanla Rusiya arasında bərkiyən şanlı dostluq və qarşılıqlı kömək ənənələri gələcəkdə də Rusiya ilə Azərbaycan arasında dostluq, müttəfiqlik münasibətlərinin inkişafı üçün etibarlı zəmin olacaq”, - deyə, V.Putin məktubda vurğulayıb.
Eləcə də mayın 4-də Moskvanın və Bütün Rusiyanın Patriarxı Kirillin Azərbaycana səfəri, onun Prezident İlham Əliyev və Birinci vitse-prezident Mehriban Əliyeva ilə görüşü də vurğulanmalıdır. Görüşdə pravoslav icmasına Azərbaycanda göstərilən qayğı və s. barədə danışılıb. “Əgər Rusiya-Azərbaycan münasibətlərindən danışırıqsa, mənə elə gəlir ki, indi hər şey çox yaxşı inkişaf edir. Tanrı qismət eləsin ki, bu, belə də davam etsin”, - deyə, Kirill bəyan edib.
Bütün bunların fonunda Azərbaycan parlamentinin üzvünə qarşı atılan addım ciddi suallar doğurur. Görünən odur ki, Rusiyada müəyyən qüvvələr iki ölkə arasında münasibətləri pozmağa çalışır. Bir daha qeyd edək ki, səfər məhz Rusiya tərəfinin dəvəti ilə həyata keçirilib. Lakin heyətin tərkibinə daxil olan Milli Məclisin deputatı Azər Badamova qarşı atılan addım məntiqli görünmür. Belə “qərar”ın hansı səbəbdən atılması isə açıqlanmayıb.
Rəsmi Moskva məsələyə aydınlıq gətirməlidir
Nəzərə alaq ki, Milli Məclisin deputatına qarşı belə addım faşizm üzərində qələbənin 80-ci ildönümü ərəfəsində atılır və buna da diqqət yetirilməlidir. Yəni deputata qarşı belə hörmətsizlik dövlətə, onun qanunverici orqanına qarşı addım kimi qiymətləndirilə bilər. Bəzi ekspertlər hesab edirlər ki, Azər Badamova qarşı bu davranışın səbəbi onun rusiyalı həmkarı Nikolay Valuyevin azərbaycanlılara qarşı söylədiyi həqarət dolu fikirlərə cavab verməsi olub. A.Badamov azərbaycanlıları təhqir edən “Vahid Rusiya” partiyasından olan deputat Nikolay Valuyev azərbaycanlıları “şobla”(banda) adlandırmasına sərt reaksiya vermişdi.
Bütövükdə, əgər Rusiya bu gün iki ölkə arasında strateji müttəfiqlik münasibətlərindən danışırsa, bu kimi addımlar yolverilməzdir. Görünən odur ki, Rusiyada “gözəgörünməz” qüvvələr var ki, hər vəchlə ikitərəfli münasibətlərə xələl gətirməyə çalışırlar. Bütün hallarda ümid edək ki, rəsmi Moskva məsələyə aydınlıq gətirəcək və münasibətlərimizə zərbə vurmağa yönəlmiş cəhdlərin qarşısını alacaq.
Nardar BAYRAMLI
