BAKI, TurkicWorld
Məhbus mübadiləsinin bu gün və sabah da davam etməsini gözləyirik.
TurkicWorld xəbər verir ki, Ukrayna prezidenti Vladimir Zelenski Rusiya ilə əldə olunan razılaşma çərçivəsində artıq 390 məhbusun dəyişdirildiyini və mübadilə prosesinin yaxın günlərdə də davam edəcəyini bildirib.
Prezident Zelenski sosial media hesabında verdiyi açıqlamada, İstanbulda keçirilən sülh danışıqları nəticəsində Rusiya ilə əldə edilən razılaşmaya əsasən, “1000 məhbusun 1000 nəfərlə dəyişdirilməsi” prosesinin başladığını bəyan edib. O, razılaşmanın ilk mərhələsində 390 nəfərin azad edildiyini təsdiqləyib.
“Məhbus mübadiləsinin şənbə və bazar günləri də davam edəcəyini gözləyirik. Bütün vətəndaşlarımızın geri qaytarılması üçün səylərimizi davam etdiririk”, – deyə Zelenski bildirib.
Ukrayna lideri məhbus mübadiləsinin gerçəkləşməsində rol alan bütün tərəflərə təşəkkür edib və diplomatik yollarla bu cür humanitar təşəbbüslərin davam etdirilməsinin vacibliyini vurğulayıb.
Qeyd edək ki, Ukrayna ilə Rusiya arasında əsir mübadiləsi prosesi müharibənin əvvəlindən bəri fasilələrlə həyata keçirilir. İstanbul danışıqları bu istiqamətdə tərəflər arasında mühüm diplomatik irəliləyiş kimi qiymətləndirilir.
