“Rheinmetall” (Almaniya) və “Reliance Defence Ltd” (Hindistan) şirkətləri sursat istehsalı sahəsində strateji tərəfdaşlıq barədə razılığa gəliblər.
“Poliqon” “Rheinmetall”a istinadən xəbər verir ki, bunun üçün tərəflər arasında Anlaşma Memorandumu imzalanıb.
Şirkətlər arasında əməkdaşlıq çərçivəsində “Reliance Defence Ltd”, “Rheinmetall”a orta və iri çaplı sursatlar üçün partlayıcı maddələr və barıt tədarük edəcək. Bundan əlavə, hər iki şirkət seçilmiş məhsullar üçün birgə marketinq fəaliyyətləri həyata keçirməyi və gələcək imkanlara əsaslanaraq əməkdaşlıqlarını daha da genişləndirməyi planlaşdırır.
Bu əməkdaşlığı dəstəkləmək məqsədilə “Reliance Defence Ltd”, Hindistanın Maharashtra əyalətinin Ratnagiri bölgəsində yerləşən Watad Sənaye Zonasında yeni və tamamilə sıfırdan qurulacaq istehsalat müəssisəsi inşa edəcək.
“Reliance Defence Ltd”nin bu müəssisəsi Cənubi Asiyada ən böyük istehsal komplekslərindən biri olacaq və illik olaraq 200 min ədəd artilleriya mərmisi, 10 min ton partlayıcı maddə və 2000 ton barıt istehsal etmək gücündə olacaq.
Bu əməkdaşlıq “Rheinmetall” üçün vacib xammal mənbələrinə çıxışı genişləndirəcək, tədarük zəncirlərini müştərilərinin maraqları naminə təmin edəcək və şirkət üçün yeni inkişaf imkanları yaradacaq. Hindistanda isə “Reliance Defence Ltd”nin bu müasir müəssisəsi ölkənin Silahlı Qüvvələrini təmin etməkdə mühüm rol oynayacaq. Eyni zamanda, bu layihə Hindistan hökumətinin 5 milyard ABŞ dolları dəyərində müdafiə ixracı və 5 trilyon dollarlıq iqtisadi güc vizyonunun həyata keçirilməsində də əhəmiyyətli rol oynayacaq.
