"Advanced Micro Devices" (AMD) şirkəti 2025-ci ildə 1,5 milyard dollar gəlir itkisi ilə üzləşəcəyini proqnozlaşdırır.
Azreform.info Qaynarinfo-ya istinadən xəbər verir ki, bu barədə "Reuters" agentliyi məlumat yayıb.
Şirkətin bu zərərə məruz qalmasının əsas səbəbi, ABŞ hökumətinin Çinə süni intellekt üçün nəzərdə tutulmuş qabaqcıl prosessorların ixracını məhdudlaşdırmasıdır. Yeni qaydalara əsasən, belə çiplərin ixracı üçün xüsusi lisenziya tələb olunur.
Buna baxmayaraq, AMD ikinci rüb üzrə gəlir proqnozunu açıqlayıb və bu göstərici "Wall Street" analitiklərinin gözləntilərini üstələyib. Analitiklərin fikrincə, bu, müştərilərin məhdudiyyətlər qüvvəyə minməmişdən əvvəl çipləri əvvəlcədən alması ilə bağlıdır. Şirkətin səhmləri post-birja əməliyyatları zamanı dəyişkənlik göstərsə də, əvvəlcə 6% artımdan sonra nəticədə təxminən 1% yüksəlib.
ABŞ administrasiyası - istər sabiq prezident Cozef Bayden, istərsə də hazırkı prezident Donald Tramp dövründə - süni intellekt texnologiyalarının Çində inkişafının qarşısını almaq üçün çip ixracına məhdudiyyətlər tətbiq edir. Vaşinqton bu sahədə irəliləyişlərin ABŞ-ın milli təhlükəsizliyinə təhlükə yarada biləcəyini düşünür.
AMD-nin baş direktoru Liza Su bildirib ki, ixrac məhdudiyyətlərinin əsas təsiri cari ilin ikinci və üçüncü rüblərində hiss olunacaq. Buna baxmayaraq, o, məlumat emalı mərkəzləri üçün süni intellekt çiplərindən əldə olunan gəlirin bu il yüksək ikirəqəmli faizlə artacağını gözləyir. Liza Su yaranmış vəziyyəti "qarşıdan əsən külək" kimi qiymətləndirib, lakin şirkətin bu çətinliklərin öhdəsindən gələcəyinə əmin olduğunu deyib.
Qeyd olunur ki, Çin AMD-nin ümumi gəlirinin təxminən 25%-ni təşkil edir. Analitiklərin hesablamalarına görə, yeni ixrac nəzarəti qaydaları şirkətin 2025-ci il üzrə gəlir proqnozunu təqribən 5% azalda bilər.
Şirkətin maliyyə direktoru Jan Xu da açıqlamasında təsdiqləyib ki, 1,5 milyard dollarlıq gəlir itkisi 2024-cü ilin aprelində qüvvəyə minən yeni ixrac məhdudiyyətləri ilə bağlıdır. Analitiklər isə qeyd edir ki, iri müştərilər lisenziya almaqda çətinlik çəkməmək üçün alımlarını sürətləndirirlər. Bununla belə, ehtiyatların ikinci rübdə formalaşdırılmasından sonra, üçüncü rübdə satışların artım tempi zəifləyə bilər.
