Çinin Sincan-Uyğur Muxtar Rayonunda qırğızların şifahi xalq dastanı olan “Manas”ın qorunması ilə bağlı yeni qanun layihəsi qüvvəyə minib.
Hafta.az-ın yazdığına görə, “Manas” dastanı tibet etnik qrupundan olan kral Gesar və monqol etnik qrupundan olan Canqarın qəhrəmanlıq dastanları ilə yanaşı, Çinin etnik azlıqlarının üç qəhrəmanlıq dastanından biri kimi tanınır.
Bu şah əsər əsas personajın - qırğız tayfalarını birləşdirən əfsanəvi qəhrəman Manasın həyatı ilə bağlı nağıllar silsiləsi olub, qırğız xalqının şifahi folklorunda mühüm yer tutur.
26 maddədən ibarət yeni müddəalar qırğızların bu qeyri-maddi mədəni irsinin sistemli şəkildə mühafizəsini, o cümlədən tədqiqi, tərcüməsi və nəşri ilə bağlı tədbirləri, bu dastanla bağlı ədəbi-bədii yaradıcılığı nəzərdə tutur.
“Manas” 2009-cu ildə UNESCO-nun Bəşəriyyətin Qeyri-Maddi Mədəni İrs üzrə reprezentativ siyahısına daxil edilib. O, yazılı şəkildə qeydə alınmağa cəhd edilməmişdən əvvəl özünəməxsus ritmik ifa tərzi ilə davamlı olaraq nəsildən-nəslə ötürülüb.
Bu ilin mart ayında milli səviyyəli qeyri-maddi mədəni irsin təmsilçi varislərinin altıncı qrupunun bir hissəsi olmaq üçün seçilmiş 59 yaşlı Cannur Turqanbay, "Müvafiq qanunvericilik bazası ilə “Manas”ın gələcək inkişafı üçün daha parlaq perspektivlər olacaq" deyib.
Sincan-Uyğur Muxtar Rayonu Mədəniyyət və Turizm Departamentinin direktor müavini Penq Çenq bildirib ki, yeni müddəalar Sincan qeyri-maddi mədəni irsinin yaradıcı tətbiqi və innovativ inkişafının təşviqi üçün böyük əhəmiyyət kəsb edir.
