Tədqiqatçılar dəbdəbəli dəri məhsullarına alternativ olaraq dinozavr DNT-sindən dəri yaratmağa başlayıblar. Dəri çantalar və ayaqqabılar kimi məhsullar heyvan hüquqlarının və ətraf mühitin müdafiəçilərinin qəzəbinə səbəb olsa da, moda və tekstil sənayesi fərqli alternativlər inkişaf etdirir. Lakin bu məhsulların eyni zamanda həm davamlı, həm də ekoloji cəhətdən təmiz olmasını təmin etmək ciddi problem yaradır.
Hafta.az-ın “IFL Science”a istinadən yazdığına görə, üç şirkət arasında yeni əməkdaşlıq etik və davamlı seçim təklif etmək üçün maraqlı bir üsuldan istifadə edir.
VML marketinq və reklam agentliyi Organoid Company və Lab-Grown Leather biotexnoloji şirkətləri ilə əməkdaşlıqda Tyrannosaurus rex (T-rex) DNT-sindən dəri hazırlamağa başlayıb.
Elm adamları təxminən 66 milyon il əvvəl nəsli kəsilmiş T-rex-dən daşlaşmış kollagen nümunələrindən istifadə edəcəklər. Kollagen sümüklərdə, dəridə, əzələlərdə və digər toxumalarda olan proteindir.
Kollagen nümunəsindən model kimi istifadə edən komanda kollagen zəncirini yaratmağı, onu DNT-yə çevirməyi və süni hüceyrələrlə birləşdirməyi planlaşdırır. Proses uğurlu olarsa, heyvan dərisinə bənzəyən bir quruluşun ortaya çıxacağı gözlənilir.
Sintetik alternativlərdən fərqli olaraq, bu üsulla dəri istehsalı laboratoriya mühitində bioloji strukturların inkişafına diqqət yetirir.
T-rex DNT-dən çıxarılan dəri nəsli kəsilmiş bir canlıdan alınan ilk nümunə olacaq.
Şirkətlər məhsulun davamlı və dəbdəbəli malları əvəz edə biləcək keyfiyyətə malik, "tam bioloji parçalana bilən" olduğunu iddia edirlər.
VML ilk məhsulların bu ilin sonuna qədər hazır olacağını gözlədiklərini bildirir.
