Birinci Qarabağ müharibəsində özünü adına can dediyi doğma Azərbaycana fəda edib az ömrü ilə ölümsüzlük qazanan qeyrətli oğullarımız çoxdur. 1967-ci il aprelin 18-i Masallı rayonu, Hişkədərə kəndində ziyalı ailəsində anadan olan Elşad Ağayev də son nəfəsinə qədər erməni dığalarına qarşı əsl kişi kimi döyüşüb. Ölümündən 32 il keçsə də, ürəklərdə yaşayan Vətən sevdalısının adı böyük iftixarla çəkilir.
İgidliyi, rəşadəti ilə tarixin səhifəsində şərəfli bir yer tutan Elşad Ağayev orta məktəbin bitirib, 1985-ci ilin noyabr ayında ordu sıralarına çağırılıb. Özünəməxsus mənəvi dünyası, nümunəvi xidməti əsgər və zabit heyəti qarşısında onu həmişə başıuca edib. Gürcüstanda rabitə kəşfiyyat kursunu nümunəvi başa vurub, Fəxri fərmanla təltif olunub. Elşad ordudan sonra oxumaqla bərabər, həm də Bakı baş tikinti idarəsinin 4 saylı tikinti quraşdırma zavodunda işləyib.
Ermənilərin əzəli yurd yerimiz Qarabağda apardığı işğalçılıq siyasətinə qarşı barışmaz mövqe tutan Elşad 1992-ci ilin mart ayında zavod rəhbərliyinə ərizə yazıb könüllü olaraq Milli ordu sıralarına qatılıb. Həmin ilin yay aylarında Goranboy və Ağdərənin dığalardan təmizlənmə əməliyyatlarında çox fəallıq göstərib. Daha sonra Müdafiə Nazirliyinin baş qərargahının xüsusi təyinatlı dəstəsində xidmət edib. 10 dekabr 1993-cü ildə rota komandiri kimi 8 saat ermənilərə qarşı qəhrəmancasına döyüşüb. Düşmənin Beyləqan istiqamətində hücumunun qarşısının alınmasında xüsusi şücaət göstərərək müqəddəs şəhidlik zirvəsinə ucalıb. Adı əbədi yaddaşlara köçən Elşad Ağayev ölkə rəhbərliyi tərəfindən “Dövlət bayrağı” ordeninə layiq görülüb. Təhsil aldığı Masallı rayonu, Hişkədərə kənd tam orta məktəbi hazırda şəhidin adını daşıyır.
Masallılar öz cəsur, qəhrəman oğlunun xatirəsini həmişə əziz tutur. Adəti üzrə 58 yaşının tamamında ehtiram əlaməti olaraq məzarı ziyarət edildi, önünə təzə güllər düzüldü...
Zəfər ORUCOĞLU,
Azərbaycan Jurnalistlər Birliyinin üzvü
