İnformasiya “fırtınası”
Son illərdə Azərbaycan mediası dənizdə fırtınaya düşmüş gəmini xatırladır: hay-küy, çaşqınlıq, mənasız vurnuxma. Hər gün yeni saytlar, kanallar və portallar yaranır. Amma bütün bu səthi fəallığın fonunda informasiya keyfiyyəti aşağı düşür, ciddi auditoriya isə getdikcə daha çox çaşqınlıq içində qalır.
Mənasız hay-küy
Səbəb aydındır — çəki-düzən yoxdur. Hər kəsin jurnalist, hər portal sahibinin redaktor sayıldığı bir mühitdə peşəkarlıq uduzur. Nəticədə təkrarlanan xəbərlər, səthi analizlər, ucuz başlıqlar və ictimai fikrə təsir etmə gücünün itirilməsi ilə qarşı-qarşıyayıq.
İnformasiya asılılığı
Oxucu çaşır və getdikcə xarici mənbələrə üz tutur. Bu isə sadəcə mədəni deyil, strateji itkiyə çevrilir. Çünki bu mənbələrin məqsəd və məramları bir çox halda ölkənin maraqları ilə üst-üstə düşmür. Bu isə milli təhlükəsizliyə təhdid yaradır.
Media purizmi – strategiya kimi
Etiraf etməliyik: biz keyfiyyəti unudub kəmiyyətin arxasınca qaçırıq. Media purizmi — informasiya sahəsinin təsadüfi adamlardan təmizlənməsi, peşəkarlığa, nüfuza və sistemli işə üstünlük verilməsidir.
Burada senzura deyil, standartlar nəzərdə tutulur.
Etimadı yalnız keyfiyyət bərpa edə bilər.
Redaksiyalarda institutlaşma, peşəkar jurnalistlərin təcrübə ötürməsi, komanda ruhu formalaşmalıdır.
