Ukrayna ABŞ dollarını qrivnanın baza valyutası kimi avro ilə əvəz etmək imkanını nəzərdən keçirir.
Hurriyyet.az xəbər verir ki, bu barədə Ukrayna Milli Bankının (UMB) sədri Andriy Pışnı “Reuters”ə şərhində bildirib.
Onun sözlərinə görə, Avropa İttifaqına potensial üzvlük, “müdafiə qabiliyyətimizin təmin edilməsində Aİ-nin rolunun güclənməsi, dünya bazarlarında daha böyük volatillik və qlobal ticarətin fraqmentasiyası ehtimalı” UMB-ni avronun dollar əvəzinə Ukrayna qrivnası üçün baza valyutası olub-olmamasını yenidən nəzərdən keçirməyə məcbur edir.
O qeyd edib ki, ABŞ dolları ilə əməliyyatlar Ukraynanın valyuta bazarının bütün seqmentlərində üstünlük təşkil etməyə davam edir, lakin avroda denominə edilmiş əməliyyatların payı əksər seqmentlərdə artır, hərçənd “hələlik mülayim şəkildə”.
Avropa ilə daha sıx əlaqələr və iqtisadiyyatın normallaşması sayəsində investisiya və istehlak fəallığının canlanması növbəti iki il ərzində iqtisadi artımın bir qədər yüksələrək 3,7-3,9 %-ə çatmasına kömək edəcəyini deyən Pışnı, bununla belə, iqtisadi trayektoriyanın çox cəhətdən döyüş əməliyyatlarının inkişafından asılı olduğunu əlavə edib.
“Müharibənin tez bir zamanda başa çatması, Ukrayna üçün təhlükəsizlik zəmanətlərini əhatə edərsə, şübhəsiz ki, yaxşı iqtisadi nəticələri olan müsbət ssenari olardı. Bununla belə, müharibənin başa çatmasından iqtisadi faydaların tam reallaşdırılması üçün vaxt tələb olunacağını qəbul etmək vacibdir”, – UMB sədri vurğulayıb.
Report.az
