Milli Məclisin deputatı Fazil Mustafa İsrailin Baş naziri Benyamin Netanyahunun Azərbaycan səfərinin təxirə salınmasında Tehran-Bakı yaxınlaşmasının, Türkiyənin səbəb kimi göstərilməsinə aydınlıq gətirib.
KONKRET.az xəbər verir ki, F.Mustafa pravda.az-a açıqlamasında deyib ki, bu kimi məsələlərdə gözlənilən spekulyasiyalar var idi və istənilən vaxt bunu hamı öz marağından yoza bilər.
“Netanyahunun səfərinin təxirə salınması sırf texniki məsələdir. İsrail tərəfi bu barədə açıqlama verib. Hansısa bir ölkənin prezidentinin səfərinin təxirə salınması asan iş deyil. Münasibətlərdə problem olanda belə hal baş verə bilər. İsraillə bizim münasibətlərimizdə isə heç bir problem yoxdur, yüksək səviyyədədir. Netanyahunun səfərinin təxirə salınması daxildə olan müəyyən proseslərlə bağlıdır. İsrail hazırda gərgin vəziyyətdədir. Səfərbərlik elan olunub. Əlavə 10 minə yaxın insanın yenidən orduya çağırılması kimi məsələlər, görünür, Baş nazirin ölkədən çıxmasını müəyyən dərəcədə əngəlləyib. Netanyahunun ölkədən çıxması, buradan prosesləri tənzimləməsi məsləhət olunmayıb”, – deputat bildirib.
