Samsung şirkətinin yaxın gələcəkdə təqdim etməyə hazırlaşdığı yeni Galaxy S25 Edge modeli ilə bağlı detallar getdikcə aydınlaşır. Texnologiya həvəskarlarının maraqla gözlədiyi bu cihazın bəzi texniki xüsusiyyətləri və qiymətləri artıq məlumdur.
Redaksiya məlumat verir ki, Winfuture saytında dərc olunan məlumatlara əsasən, Galaxy S25 Edge modeli incə dizaynı ilə diqqət çəkəcək. Cihazın qalınlığı cəmi 5.85 mm olacaq və bu, Samsung-un indiyə qədərki ən nazik modellərindən biri kimi tarixə düşəcək. Ekran tərəfində isə 6.7 düymlük AMOLED displey, 3120×1440 piksel çözünürlüyü və 120 Hz yeniləmə sürəti ilə təchiz olunacaq.
Telefonun daxili komponentlərinə gəldikdə, Snapdragon 8 Elite for Galaxy çipseti ilə təchiz olunacağı gözlənilir. Bu çipset, 12 GB RAM ilə birlikdə 256 GB və ya 512 GB daxili yaddaş seçimləri təklif edəcək. Kamera sisteminə gəlincə, 200 MP əsas sensor, 12 MP ultra geniş bucaqlı kamera və 12 MP ön kamera ilə təchiz olunacaq. Telefoto kamera isə bu modeldə yer almayacaq.
Digər xüsusiyyətlər arasında IP68 suya və toza davamlılıq, titandan hazırlanmış korpus, 3900 mAh batareya, Bluetooth 5.4 və Wi-Fi 7 də qeyd olunur. Cihazın titandan hazırlanmış Jet Black, Titanium Ice Blue və Titanium Silver rəng variantları ilə təqdim olunacağı bildirilir. Avropa bazarı üçün qiymətlər 256 GB yaddaşlı model üçün 1249 avro, 512 GB yaddaşlı model üçün isə 1369 avro olaraq gözlənilir. ABŞ bazarı üçün isə qiymətlər müvafiq olaraq 1049 dollar və 1140 dollar olacağı proqnozlaşdırılır. Galaxy S25 Edge-in 13 may tarixində təqdim olunacağı gözlənilir.
Yeni Galaxy S25 Edge modeli, Samsung-un mobil texnologiyalar sahəsindəki yeniliklərini əks etdirən iddialı bir cihaz olacaq. İncə dizaynı, güclü performansı və yüksək keyfiyyətli kamerası ilə istifadəçilərin diqqətini çəkəcəyi şübhəsizdir.
Fərid Əlizadə
