ABŞ-ın vitse-prezidenti Ceyms Devid Vens Ukraynanın davam edən münaqişədə Rusiyanı məğlub edə bilməyəcəyinə inandığını bildirib.
Publika.az Almaniyanın "Die Welt" nəşrinə istinadən xəbər verir ki, o bəyan edib ki, döyüşlər davam edərsə, Ukrayna cəmiyyəti ciddi daxili böhranla üzləşə bilər.
O, siyasi fəal Çarli Kirklə podkast söhbəti zamanı 1991-ci il sərhədlərinə qayıdışın mümkün olduğuna inanmadığını açıqlayıb: "Düşünürəm ki, əsas mediada belə qəribə fikir var ki, döyüşlər daha bir neçə il davam edərsə, ruslar uduzacaq, ukraynalılar öz ərazilərini geri alacaq və hər şey münaqişədən əvvəlki vəziyyətə qayıdacaq. Bu, bizim yaşadığımız reallıq deyil".
Vens xəbərdarlıq edib ki, münaqişə illər boyu davam edərsə, bu, böyük insan itkiləri ilə nəticələnəcək və hətta nüvə eskalasiyasına gətirib çıxara bilər. Bundan əlavə, ABŞ-ın vitse-prezidenti böhranın daha da dərinləşməsinin qarşısının alınmasının vacibliyini vurğulayıb.
Bundan başqa o, ABŞ prezidenti Donald Trampın sülh danışıqlarının irəliləyişinə dair səylərini ABŞ-ın keçmiş prezidenti Co Baydenin rəhbərlik etdiyi əvvəlki administrasiyadan daha effektiv adlandırıb. Onun sözlərinə görə, qısa müddət ərzində tərəflərin mümkün atəşkəslə bağlı tələblərini açıq şəkildə formalaşdırmağa başlamasına nail olmaq mümkün olub.
