Rusiya Silahlı Qüvvələrinin Baş Qərargah rəisi Valeri Gerasimov Vladimir Putinə Kursk vilayətinin Ukrayna Silahlı Qüvvələrindən azad edilməsi üzrə əməliyyatın başa çatması barədə məlumat verib. Bu barədə “İnterfaks”a Rusiya Prezidentinin mətbuat katibi Dmitri Peskov məlumat verib.
Gerasimovun sözlərinə görə, aprelin 26-da rus hərbçiləri Kursk vilayətində sonuncu yaşayış məntəqəsini – Qornal kəndini Ukrayna bölmələrindən “azad edib”.
Valeri Gerasimov Putinə Kursk vilayətinin “azad edilməsi” barədə məruzə edərkən həm də Şimali Koreyadan olan hərbçilərin buna “kömək etdiyini” də qeyd edib.
Hurriyyet.az xəbər verir ki, Ukrayna Silahlı Qüvvələrinin Baş Qərargahı Kurskun tam azad edilməsi barədə Rusiya tərəfinin iddialarını təkzib edib. Qeyd olunur ki, Rusiya ali komandanlığının nümayəndələrinin Kursk vilayətində hərbi əməliyyatların guya sona çatması ilə bağlı bəyanatı reallığa uyğun gəlmir: "Ukrayna Müdafiə Qüvvələrinin Kursk vilayətinin müəyyən ərazilərində müdafiə əməliyyatı davam edir. Əməliyyat vəziyyəti ağır olsa da, bölmələrimiz bütün növ silahlardan, o cümlədən aktiv müdafiə taktikasından istifadə etməklə ruslara effektiv atəş zərbələri vurmaqla müəyyən mövqeləri tutmaqda və qarşıya qoyulmuş tapşırıqları yerinə yetirməkdədir. Döyüş toqquşmaları hələ də davam edir”.
Həmçinin bildirilir ki, Ukrayna bölmələrinin mühasirəyə düşməsi təhlükəsi yoxdur.
AzPolitika.info
