Yeni bir araşdırma göstərir ki, səhər oyanma saatı səsləndikdən sonra yenidən yatmağa çalışanların sayı gözləniləndən daha çoxdur və bu vərdiş yuxunun keyfiyyətinə birbaşa təsir göstərə bilər.
HİT.az xəbər verir ki, yuxu həm fiziki, həm də mənvi sağlamlığımız üçün həyati əhəmiyyət kəsb edir. Lakin təsiri yalnız nə qədər yatdığımızdan deyil, həm də yuxunun keyfiyyətindən asılıdır. Son illər mütəxəssislərin diqqət mərkəzində olan mövzulardan biri də səhər oyanma saatı çalanda yenidən yatmaq, yəni "təxirə salmaq" vərdişidir. Yeni bir araşdırma bu vərdişin nə qədər yayıldığını və potensial təsirlərini aşkar edir.
İdeal dünyada saat qurmadan oyanmaq mümkün olardı. Lakin real həyatın tempi əksər insanları müəyyən saatda oyanmağa məcbur edir. Bu isə yuxunun keyfiyyətinin müddəti qədər əhəmiyyətli olduğunu bir daha vurğulayır. Yuxunun kəsintisiz olması və oyanma üsulu da bu keyfiyyəti birbaşa təsirləyir.
Mütəxəssislər uzun zamandır bildirirlər ki, saat çalıb oyandıqdan sonra yenidən yatmaq ("təxirə salmaq" düyməsinə basmaq) yuxunu bərpa etmir. Buna baxmayaraq, yaxın tarixli araşdırma bu vərdişin hələ də geniş yayıldığını göstərir.
Brigham and Women's Hospital-dan Dr. Rebekka Robbinsin rəhbərliyi altında olan qrup, Sleep Cycle adlı yuxu tətbiqinin məlumatlarını təhlil edərək 21.000 nəfərin 3 milyon gecəlik yuxu davranışını araşdırıb. Nəticələrə görə, yuxuların 55,6%-ində ən az bir dəfə təxirə salma düyməsinə basılıb. İştirakçıların 45%-i isə demək olar ki, hər dəfə saatı təxirə saldığını bildirib.
Məlumatlara görə, orta hesabla istifadəçilər saat çalıb oyandıqdan sonra təxminən 11 dəqiqə daha yatır. Təxirə salma vərdişi daha güclü olan qruplarda bu müddət 20 dəqiqəyə çatır. Hər gecə orta hesabla 2,4 dəfə təxirə düyməsinə basıldığı müəyyən edilib. Araşdırma həmçinin qadınların bu vərdişə kişilərdən daha çox üz tutduğunu göstərir.
Dr. Robbinsə görə, bu davranış zərərsiz bir rahatlama üsulu kimi görünsə də, yuxunun ən kritik mərhələlərini pozur. Xüsusilə oyanmadan əvvəlki saatlar sürətli göz hərəkəti (REM) yuxusu üçün vacibdir. Təxirə salmaq bu mərhələləri kəsərək yuxunu səthiləşdirir və dinclik vermir.
Samir
