Azərbaycan Milli Olimpiya Komitəsinin (MOK) Ədalətli Oyunlar Komissiyasının 2024-cü ilin yekunlarına həsr olunmuş mükafatlandırma mərasimi keçirilib.
90deqiqe.Az xəbər verir ki, MOK-un vitse-prezidenti Çingiz Hüseynzadə 27 ildir Olimpiya Komitəsində Ədalətli Oyunlar Komissiyasının fəaliyyət göstərdiyini xatırladıb: "Ötən il Azərbaycan idmanında vacib hadisələr baş verdi. Biz də ədalətli oyun prinsipinə sahib olan idmançıları, rəhbər şəxsləri və media nümayəndələrini bu münasibətlə mükafatlandırırıq”.
Milli Olimpiya Komitəsinin (MOK) Ədalətli Oyunlar Komissiyasının sədri Xəzər İsayev ədalət prinsipinin təbliğini daim yüksək səviyyədə aparacaqlarını vurğulayıb: "Biz Avropa və Beynəlxalq Ədalətli Oyunlar Komissiyaları ilə birgə işlər görürük. Artıq hər kəs Azərbaycanda idmanın ədalətlə idarə olunduğunun şahidi olub".
Rəsmi çıxışlardan sonra ədalətli oyun sahəsində fərqlənənlərə mükafatlar təqdim edilib.
Ədalətli oyun prinsiplərinə sadiq bədən tərbiyəsi və idman xadimi nominasiyasında Azərbaycan Cüdo Federasiyasının prezidenti Rəşad Nəbiyev, ədalətli oyun prinsiplərinə sadiq idmançı kimi Qaşım Maqomedov, (taekvondo), ədalətli oyun prinsiplərinə sadiq məşqçi nominasiyasında Tərlan Həsənov (cüdo), ədalətli oyun prinsiplərinə sadiq hakim mükafatını Emil Qurbanəliyev (boks) və ədalətli oyun prinsiplərinin ən yaxşı təbliğatçısı mükafatı isə "İctimai TV"yə təqdim olunub.
