Bu ilin birinci rübündə Rusiyada 213 Çin avtosalonu qapılarını bağlayıb. Bu say 2024-cü ildə bağlanan toplam dilerlərin sayından çoxdur.
Hafta.az-ın Lenta.ru-ya istinadən yazdığına görə, bağlanmalar Bestune, Kaiyi, DFM və LiAuto kimi tək brend istehsalçılarda cəmləşib, eyni zamanda əsas oyunçular Geely və Jetour da ciddi daralmalarla üzləşib. Satışların azalması, yüksək faiz dərəcələri, artan vergi yükləri və keyfiyyətlə bağlı suallar bu çöküşün əsas səbəbləri kimi önə çıxır.
Analitiklər hesab edirlər ki, azalma 2024-cü ildə müstəsna olaraq yüksək baza ilə bağlıdır. İl ərzində Çin avtomobillərinin satışında 15-17 faiz azalma gözlənilsə də, bu vəziyyətin Çinin Rusiya bazarındakı ümumi üstünlüyünə son qoymayacağı gözlənilir. Lakin kreditlə avtomobil alışlarının kəskin azalması və qiymətlərin əlçatmaz olması istehlakçıları alternativlər axtarmağa vadar edir.
Digər tərəfdən, avtomobilin keyfiyyəti ilə bağlı tənqidlər də artır. Çin avtomobillərinin təhlükəsizlik testlərində zəif çıxışı, xidmət şəbəkələrinin qeyri-kafiliyi və ehtiyat hissələrinin əldə edilməsində çətinliklər bir çox istehlakçıları narahat edir. Fit Service-in təhlilinə görə, ən etibarlı 100 model arasında heç bir Çin markası olmayıb. Bu, bəzi Çin markalarının orta müddətli perspektivdə bazardan tamamilə çıxması riskini artırır.
Qiymətlərin artması, satışların azalması və istehlakçı inamının azalması Rusiya avtomobil bazarında yeni eranın başlanmasından xəbər verir. “Lada” kimi yerli brendlər bazar paylarını artırsalar da, istehsal imkanlarının məhdud olması səbəbindən Çinin “böyük dördlüyünə” qarşı güclü rəqabət yaratmaqda çətinlik çəkirlər. Mütəxəssislərin fikrincə, Qərb brendləri geri dönərsə, Çin avtomobillərinin qiymətlərində ciddi eniş baş verə bilər.
