“II Dünya Müharibəsi miqyasına və bəşəri faciəsinə görə müasir tarixin ən dəhşətli müharibəsidir. Dünyanın 70-dən çox ölkəsi 55 milyondan çox insanın ölümü ilə nəticələnən müharibəyə sürüklənib. On minlərlə şəhər və qəsəbə dağıdılaraq yer üzündən silindi. Hesablamalara görə, hərbi xərclər və bu müharibənin ümumi zərəri indiki məzənnə ilə 4,5 trilyon dollar olub”.
Hafta.az-ın yazdığına görə, bunu bu səhər paytaxt Düşənbədəki Qələbə Parkında təşkil olunan hərbi paraddan öncə etdiyi çıxışında Tacikistan prezidenti Emoməli Rəhmon deyib.
Prezident qeyd edib ki, qanlı döyüşlər meydanı Tacikistandan minlərlə kilometr aralıda olsa da, əks-sədası Tacikistanın hər yerində eşidilib, hər bir tacik ailəsi bu faciədən əziyyət çəkib: “Təkcə şəhərlərdə deyil, ölkəmizin ən ucqar kəndlərində elə bir ailə yox idi ki, ata, qardaş, oğul, qohum-əqrəbasını faşist işğalçılarına qarşı döyüş meydanına göndərməsin”.
O, bu müharibəni “tarixin ən qaranlıq səhifəsi və tacik xalqı üçün böyük faciə” adlandırıb: “Çünki o vaxt Tacikistanın bir milyon yarım sakinindən 300 mindən çox insan döyüş meydanına səfərbər edilib ki, bu da ölkənin əmək qabiliyyətli əhalisinin 50 faizini təşkil edirdi. Onların 100 mindən çoxu döyüşlərdə canını verib, 40 mindən çoxu itkin düşmüş, 60 min nəfəri isə müharibədən əlil olaraq qayıdıb. Onların məramı tacik xalqını bu böyük qələbəyə çatdırmaqla, bütün dünyada sülh və təhlükəsizliyi təmin etmək olub”.
Prezident Rəhmon müharibənin Tacikistan üçün ağır nəticələrini də xatırladaraq deyib ki, ölkə 100 mindən çox qaçqını qəbul edərək onlara sığınacaq, yemək, paltar verib, cəbhəyə kömək üçün bütün resursları səfərbər etməli olub.
“Çox sayda qadın və uşaq fabriklərdə işləyir, cəbhəni lazım olan hər şeylə təmin edirdi. Tacikistanın 45 mindən çox sakini Sovet İttifaqının digər bölgələrindəki sənaye müəssisələrinə göndərildi, onların əksəriyyəti oradan müharibəyə səfərbər edildi”, - prezident qeyd edib.
Dövlət başçısı çıxışında müharibə qəhrəmanlarının xatirəsinin əbədiləşdirilməsinə xüsusi diqqət yetirib. O, 58 min tacik əsgər və zabitinin orden və medallarla təltif edildiyini, 55 nəfərin isə Sovet İttifaqı Qəhrəmanı adına layiq görüldüyünü vurğulayıb. Qeyd edib ki, onların mərdliyi və mətanəti gənclərə və ölkənin Silahlı Qüvvələrinə örnəkdir.
"Biz əcdadlarımızın şücaəti ilə fəxr edirik. Onların hər biri həm ön, həm də arxa cəbhədə qələbə qazanıb. Onların cəsarəti bizim əbədi bələdçimizdir", - Emoməli Rəhmon bildirib.
Dövlət başçısı həmçinin xatırladıb ki, xalqın və silahlı qüvvələrin səyləri sayəsində Tacikistanda 1990-cı illərdə 150 mindən çox insanın həyatına son qoyan vətəndaş müharibəsi dayandırılıb.
Prezident sülhün və sabitliyin gələcək nəsillər üçün əhəmiyyətini bir daha xatırladıb, həmçinin BMT Baş Assambleyasında “Gələcək nəsillər üçün sülhün möhkəmləndirilməsi onilliyi”nin elan edilməsi təşəbbüsünü səsləndirib: “Tacikistan dəhşətli müharibədən sağ çıxmış bir ölkə olaraq həmişə bütün fikir ayrılıqlarının və münaqişələrin sülh danışıqları yolu ilə həllinin tərəfdarıdır”.
