"PUA hücumları Rusiya aviasiyasını iflic edib, Moskvada planlaşdırılan bayram tədbirləri pozula bilər..."
Moskvada keçiriləcək bayram tədbirləri ərəfəsində Rusiya mülki aviasiya sistemi ciddi çətinliklər və fasilələrlə üzləşib. PUA hücumları və tətbiq edilən məhdudiyyətlər nəticəsində bir çox reyslər ya ləğv olunub, ya da təxirə salınıb.
Moderator.az xəbər verir ki, bu barədə "moscowtimes" nəşri məlumat yayıb.
Diqqətçəkən məqam budur ki, bu kütləvi aviasiya böhranı məhz Moskvaya, o cümlədən Çin Xalq Respublikasının sədri Si Tszinpinin başçılıq etdiyi xarici nümayəndə heyətlərinin gəlişinə hazırlıq dönəminə təsadüf edib.
Paytaxtın əsas hava limanları olan "Şeremetyevo", "Domodedovo", "Vnukovo" və "Jukovski" müvəqqəti olaraq reyslərin qəbulunu və yola salınmasını dayandırıb. Bu da kütləvi gecikmələrə və reyslərin ləğvinə səbəb olub.
"Aeroflot", "Rossiya", "S7", "Pobeda" və vUral Hava Yolları" da daxil olmaqla bir neçə aviaşirkət onlarla reysin ləğv edildiyini, uçuşların gecikdiyini və bəzi təyyarələrin ehtiyat hava limanlarına yönləndirildiyini bildirib.
RBK-nın məlumatına görə, təxminən 8,5 min sərnişin Rusiyanın müxtəlif şəhərlərində və xaricdə reyslərini gözləyərək yubanıb, bu reyslər ya Moskvaya gedirdi, ya da oradan uçmalı idi.
Bundan əlavə, yerli hakimiyyət orqanlarının məlumatına görə, Sibir bölgəsindəki on şəhərin hava limanlarından 4 min nəfərdən çox insan uça bilmir. Bu problemlərin əksəriyyəti Moskva aviasiya qovşağında tətbiq olunan uçuş məhdudiyyətləri ilə əlaqədar reyslərin gecikməsi nəticəsində yaranıb.
"Baza" Teleqram- kanalının yazdığına görə, "Emirates" aviaşirkətinin Dubay - Domodedovo reysi Sankt-Peterburqda yerə enib və sərnişinlər 6 saat təyyarədə saxlanılıb. Sonda isə onlara sadəcə olaraq Moskvaya özləri çatmaq təklif olunub.
"Sərnişinlərin dediyinə görə, çoxları o qədər tükənib ki, artıq aviaşirkət nümayəndələrindən heç bir tələb irəli sürməyib. Oxşar vəziyyət "Pegasus Airlines"ın Antaliya - Moskva reysi sərnişinlərinin başına gəlib. Bu reys də "Pulkovo" hava limanına eniş edib və sərnişinlərin sözlərinə görə, artıq 7 saatdır təyyarədə "heyvan kimi" saxlanılır.
"Uzbekistan Airways"in Daşkənd - Moskva reysinin və "Aeroflot"un Çelyabinsk - Moskva reysinin sərnişinləri də gecəni təyyarədə keçirib. Lakin 7 saatlıq gözləmədən sonra onlara nəhayət hava limanına daxil olmağa icazə verilib", - kanal yazır. Ümumilikdə, Moskva hava limanlarında və Moskvaya uçan istiqamətlərdə 140-dan çox reys ya gecikib, ya da ləğv olunub.
"Nəticədə, 6 və 7 may tarixlərində Mərkəzi Rusiyanın bir çox hava limanlarında xaos yaranıb. Ləğv edilmiş və ya gecikmiş reyslərin sərnişinləri saatlarla hava limanı binalarında oturub, bu binaların bir çoxu artıq dolub. İnsanlar aviaşirkətlərin kömək etmədiyindən, onlara nə yemək, nə içki, nə də gecələmək üçün yer təmin olunmadığından şikayətlənir", - nəşr qeyd edir.
