İsrail və HƏMAS uzun illərdir ki, müharibə aparır. Lakin nə qalib müəyyənləşib, nə də sülh əldə olunub. Əksinə, hər ötən gün Qəzzada vəziyyət daha da gərginləşir. Bəs görəsən, HƏMAS və İsrail arasında daimi sülh üçün hansı şərtlər olmalıdır? Ümumiyyətlə, tərəflər arasında daimi sülh mümkündürmü?
Mövzunu KONKRET.az-a Siyasi Texnologiyalar Mərkəzinin rəhbəri Vəli Əlibəyov şərh edib:
“İsrail və HƏMAS arasında indiki məqamda hansısa sülhdən danışmaq çətindir. Çünki tərəflər arasında uçurum çox genişdir. Hazırda biz atəşkəsdən və uzunmüddətli sakitlikdən söz edə bilərik. Məhz bundan sonra hansısa sülhün imzalanması mümkündür. Məlumdur ki, HƏMAS İsraili dövlət kimi qəbul etmir. Bu da sülhün qarşısını alan əsas səbəbdir. Üstəlik, İsrail də HƏMAS-ı terror təşkilatı kimi tanıyır. Bu fakt onların danışıqlar masasına əyləşməsini əngəlləyir. Odur ki, tərəflər öz ideoloji yanaşmalarından əl çəkməlidir. Beynəlxalq ictimaiyyət isə bu məsələnin həlli üçün daha aktiv fəaliyyət göstərməlidir. Bütün bu məsələlərin həllinə isə vaxt lazımdır. Eyni zamanda beynəlxalq siyasi dəyişikliklər baş verməlidir və HƏMAS-ı dəstəkləyən güclər zəifləməlidir, onlar münaqişəni alovlandırmamalıdır. Digər tərəfdən, İsrail üçün təhlükəsizlik zəmanəti verilməlidir, amma bunu heç kim etmir. Həmçinin HƏMAS hərbi qarşıdurmadan çəkinib siyasi mübarizəyə qoşulmalıdır, yəni tərksilah olunmalıdır. Çünki HƏMAS-ın əlində silah olduğu təqdirdə, sülhdən danışmaq mümkün olmayacaq. Bununla yanaşı İsrail Qəzzada blokadanı aradan götürməli və əhalinin rifahı üçün addımlar atmalıdır. Bu halda xalq HƏMAS-ı dəstəkləməkdən əl çəkəcək. Bölgədə sülhün açarı məhz bu amillərlə bağlıdır. Amma şərtlərin yerinə yetirilməsi üçün siyasi iradə olmalıdır”.
Müşviq Tofiqoğlu
KONKRET.az
