Şimali Koreya Rusiyaya 15 minə yaxın əmək miqrantı göndərib. Bu barədə “The Wall Street Journal” və “Reuters” Cənubi Koreya kəşfiyyatına istinadən yazır.
Qeyd olunur ki, Şimali Koreya vətəndaşlarının xaricdə işləmək üçün işə götürülməsi BMT Təhlükəsizlik Şurasının qərarı ilə Pxenyanın nüvə proqramlarının maliyyələşdirilməsini məhdudlaşdırmağa yönəlmiş sanksiyalar çərçivəsində qadağan edilib.
“Nastoyaşeye vremya” qeyd edir ki, Rusiya statistikasına görə, 2024-cü ildə Rusiyaya daxil olan Şimali Koreyalıların sayı əvvəlki illə müqayisədə 12 dəfə artıb.
Bir çox KXDR vətəndaşı Rusiyaya tələbə vizası ilə daxil olub. "Mühüm hekayələr" FSB Sərhəd Xidmətinə istinadən yazıb ki, 2024-cü ildə 7,8 min Şimali Koreya vətəndaşı Rusiyaya təhsil almaq üçün gəlib - bu, 2019-cu ildən bəri maksimum göstəricidir. “Mediazona” qeyd edir ki, Şimali Koreyadan olan tələbələrin sayı 2024-cü ilin üçüncü rübündə artmağa başlayıb. Eyni zamanda, hələ 2024-cü ilin aprelində Təhsil və Elm Nazirliyi həmin vaxt ölkədə KXDR-dən olan 130-a yaxın tələbənin təhsil aldığını bildirmişdi.
KXDR vətəndaşlarının əksəriyyətinin hazırda Uzaq Şərqdə işlədiyi bildirilir. Qeyd olunur ki, yerli işəgötürənlər KXDR-dən olan işçiləri aşağı əmək haqqı ilə razılaşdıqları, gündə 12 saat işləməyə hazır olduqları və iş şəraitindən şikayət etmədikləri üçün qiymətləndirirlər.
Fevralın əvvəlində “Yonhap” Xəbər Agentliyi də kəşfiyyat məlumatlarına istinadən xəbər vermişdi ki, Pxenyan işçi qüvvəsi çatışmazlığı şəraitində minlərlə işçini Rusiyaya göndərib. Rusiya Əmək Nazirliyinin məlumatına görə, 2030-cu ilə qədər ölkədə işçi qüvvəsi çatışmazlığı indiki 1,5 milyon nəfərlə müqayisədə 2,4 milyon nəfərə çata bilər.
Almaz Həsənli
