Belçikalı tədqiqatçılar nisbətən gənc yaşda başlayan xəstəliyin nadir irsi variantı olan erkən başlanğıc Alzheimer xəstəliyini anlamaqda mühüm addım atıblar.
Bakıvaxtı.az-ın məlumatına görə, onlar müəyyən ediblər ki, müəyyən genetik mutasiyalar bioloji saat kimi həyatın müəyyən bir vaxtında xəstəliyi tətikləyə bilər.
Məlumata görə, Alzheimer xəstəliyi dünyada təxminən 50 milyon insanı əhatə edən ən mürəkkəb və geniş yayılmış neyrodegenerativ xəstəliklərdən biridir. Onun dəqiq səbəbləri hələ də tam başa düşülməyib, lakin məlumdur ki, xəstələrin beynində amiloid lövhələr, xüsusi zülalların klasterləri toplanır.
Qeyd olunub ki, erkən başlayan Alzheimer xəstəliyi ailələrdə yayılan və erkən yaşlarda başlayan xəstəliyin nadir formasıdır. Son vaxtlara qədər həkimlər spesifik mutasiyaların xəstəliyin inkişafına necə təsir etdiyini dəqiq qiymətləndirə bilmirdilər.
Belə ki, alimlər xəstəliyin inkişafı ilə əlaqəli olan üç geni tədqiq ediblər: APP, PSEN1 və PSEN2.
Məlum olub ki, bu genlərdəki müxtəlif mutasiyalar insanın ilk əlamətləri - yaddaş itkisi, çaşqınlıq və demensiyanın digər əlamətlərini göstərməyə başladığı yaşa təsir edir.
Tədqiqatın müəllifləri konkret mutasiyanın nə qədər təhlükəli olduğunu və xəstəliyin nə vaxt başlaya biləcəyini əvvəlcədən qiymətləndirməyə imkan verən xüsusi model hazırlayıblar.
Üstəlik, onlar müəyyən ediblər ki, beyində müəyyən zülalların nisbəti dəyişdirilərsə, xəstəliyin inkişafı bir neçə il ləngiyə bilər.
Bu kəşf həkimlərə Alzheimer xəstəliyinə daha dəqiq diaqnoz qoymağa və müvafiq müalicə üsullarını seçməyə kömək edəcək.
Gələcəkdə elm adamları simptomlar görünməzdən əvvəl xəstəliyin gedişatını yavaşlatan dərmanlar hazırlamağa ümid edirlər.
Mina Mikayılova
