Hazırda ABŞ-ın Ukraynada müharibəyə son qoymaq üçün sülh danışıqlarından çəkilməyə hazır olub-olmadığını söyləmək çətindir, çünki siyasət çox gözlənilməz hala gəlib...
Poliqon xəbər verir ki, bu fikri Ukraynanın Braziliyadakı səfiri Andrey Melnik RBC-Ukraynaya müsahibəsində bildirib.
Diplomat qeyd edib ki, bu cür bəyanatlar danışıqlar prosesində taktika da ola bilər:
"Almanlarda belə bir anlayış var - Zweckoptimismus. Yəni insan özünü nikbinliyə məcbur edir. Hətta vəziyyət ümidsiz görünsə də, özünü müsbət nəticəyə inanmağa məcbur edirsən. Mən də bu alman formuluna əsaslanaraq, bunun danışıqlar prosesinin taktikası olduğunu ümid edirəm".
Onun sözlərinə görə, bu taktikanın effektivliyi müşahidə olunur: dünya liderləri daha sürətli qərarlar qəbul etməyə başlayıblar:
"Biz demək olar ki, hər həftə ABŞ Dövlət Departamentinin rəhbərindən və ali səviyyədə bəyanatlar eşidirik: "artıq hər şey bitir, ip qopur". Bu bizi, təbii ki, narahat edir. Axı söhbət ya qalib gəlməkdən, ya da məhv olmaqdan gedir - mövcudluğumuz təhlükə altındadır".
Melnik əmindir ki, ABŞ sülh danışıqlarından çıxmayacaq, çünki bu, Amerikanın öz maraqlarına da uyğun deyil:
"Çünki mən təsəvvür edə bilmirəm ki, ABŞ prezidenti təkcə öz seçicilərinə deyil, həm də dünya ictimaiyyətinə, gələcək nəsillərə, tarix qarşısında necə izah edə bilər ki, bu məsələ niyə uğurla yekunlaşmadı".
Diplomat əlavə edib ki, əgər ABŞ vasitəçilik missiyasını dayandırarsa, Rusiya daha böyük qəddarlıqla müharibəni davam etdirəcək və göstərməyə çalışacaq ki, Ukrayna sonuncu şansını itirdi. Bu zaman Rusiya daha çox ərazi işğal etməyə və daha çox insanı məhv etməyə çalışacaq.
"Amerikalılar isə buna sadəcə kənardan baxacaqlar. Belə bir ssenaridən ABŞ mütləq şəkildə uduzmuş çıxacaq", deyə Melnik yekunlaşdırıb.
Poliqon.info
