Astanada İkinci Dünya müharibəsində Qələbənin 80 illiyi və müharibə qəhrəmanı Baurjan Momışulun anadan olmasının 115-ci ildönümü münasibətilə nəhəng fotomozaika portreti yaradılıb.
AZƏRTAC Qazaxıstan paytaxtının icra orqanının mətbuat xidmətinin məlumatına istinadla xəbər verir ki, bu nadir portretin yaradılması prosesində rəssamlıq dərnəklərinin 600-dən çox azyaşlı üzvü iştirak edib.
Müharibə qəhrəmanının nəhəng təsviri uşaqların yüzlərlə əl işindən tərtib edilib və 2736 kvadratmetr sahəni əhatə edir.
Bu layihənin Ginnesin Rekordlar Kitabında qeydiyyata alınması üçün müraciət edilib. Rəsmi təsdiqdən sonra bütün iştirakçılar müvafiq adlı sertifikatlar və medallar alacaq, onların adları isə xüsusi kitaba daxil ediləcək.
