Azərbaycanlı futbolçu Mahir Emrelinin şərəfini qoruduğu "Nürnberq" klubu bu gün Almaniya 2-ci Bundesliqasında vacib oyuna çıxacaq.
Offsideplus.az xəbər verir ki, Miroslav Klozenin rəhbərlik etdiyi kollektiv doğma azarkeşlər önündə "Elversberq"i qəbul edəcək.
Hazırda 45 xalla 10-cu pillədə qərarlaşan "Nürnberq" 3-cü yeri tutub pley-offa düşmək üçün rəqibini mütləq məğlub etməlidir. Əks təqdirdə, sona 2 tur qalmış komandanın bütün ümidləri puça çıxacaq.
Bu baxımdan "Nürnberq"in Mahir Emrelinin köməyinə ehtiyacı var. Həmvətənimiz son 3 turda 4 qol vurub. 27 yaşlı hücumçu ötən ilin payızında 4 oyunluq qol seriyasına nail olub (biri kubokda olmaqla 4 matçda 4 qol).
Emreli əl sümüyündən zədələnsə də, bugünkü görüşə xüsusu hazırlanmış şinlə çıxacaq.
Oyunla bağlı ən maraqlı məqamları saytımız vasitəsilə izləyə bilərsiniz.
2-ci Bundesliqa, XXXII tur
15:30 "Nürnberq" - "Elversberq"
