Bu il ADA Universitetində 13-cü Karyera Sərgisi keçirilir. Karyera sərgisinin təşkili artıq ənənə halını alıb.
AZƏRTAC xəbər verir ki, bu sözləri ADA Universitetinin Karyera xidmətləri ofisinin meneceri Təranə Aslanova jurnalistlərə müsahibəsində söyləyib. O bildirib ki, sərgidə aparıcı şirkətlər və dövlət qurumları təmsil olunur. Bu şirkətlər müxtəlif sənaye sahələrini – istehsalat, maliyyə, kommunikasiya və s. əhatə edir.
“Sərgiyə tələbələrimizi, məzunlarımızı dəvət etmişik. Onlar şirkət nümayəndələri ilə ünsiyyətdə olur, öz SV-lərini təqdim edirlər. Şirkət nümayəndələri də daxildə olan təcrübə proqramları və iş imkanları haqqında məlumat verirlər. Tələbə və məzunlarımız hər zaman sərgidə iştirak edir və əksəriyyəti iş proqramlarına müraciət edirlər”, – deyə Təranə Aslanova qeyd edib.
