"ABŞ və Avropa İttifaqı Rusiyanın atəşkəslə bağlı razılığa gəlməyəcəyi təqdirdə yeni sanksiyaların tətbiq ediləcəyini istisna etmir..."
Rusiya prezidenti Vladimir Putin Ukrayna və onun Qərb müttəfiqlərinin mayın 12-dən etibarən 30 günlük qeyd-şərtsiz atəşkəs elan etmək təklifini rədd edib.
Moderator.az xəbər verir ki, bu barədə "bbc.com"' nəşri məlumat yayıb.
Məlumatda deyilir ki, Rusiya hakimi Vladimir Putin mayın 11-də gecə verdiyi bəyanatda Kiyevi əvvəlki atəşkəsləri pozmaqda ittiham edib və bu səbəbdən yeni atəşkəsə razı olmadığını bəyan edib. Bunun əvəzində o, Moskva və Kiyev arasında mayın 15-də İstanbulda birbaşa danışıqların keçirilməsini təklif edib. O, deyib ki, Rusiya bu danışıqlarda heç bir ilkin şərt irəli sürmədən iştirak etməyə hazırdır.
Putinin sözlərinə görə, bu danışıqlar 2022-ci ilin yazında keçirilmiş və nəticəsiz başa çatmış İstanbul danışıqlarının davamı olmalıdır. Həmin vaxt Rusiya Ukraynanın NATO-ya üzv olmaması və neytral status qazanmasını tələb edib. Ukrayna isə yalnız beynəlxalq təhlükəsizlik zəmanətləri müqabilində bu tələblərə müsbət yanaşa biləcəyini bəyan edib.
Putin son çıxışında qeyd edib ki, atəşkəs barədə razılığa gəlmək mümkündür, lakin bu zaman Ukraynanın silahlanmasının və ordu hazırlığının qarşısı alınmalıdır. Bu, Kreml tərəfindən əvvəllər də irəli sürülmüş şərtlərdir və Qərb dövlətləri ilə Kiyev tərəfindən qəbuledilməz sayılır.
Ukraynanın atəşkəslə bağlı son təklifi Kiyevdə keçirilmiş "qərarlılar ölkələri" sammitindən sonra irəli sürülüb. Almaniya, Fransa, Böyük Britaniya və Polşa liderləri bu təşəbbüsü dəstəkləyib və ABŞ prezidenti Donald Tramp da onlarla telefon danışığı zamanı təklifi dəstəklədiyini bildirib.
Qərb liderləri, o cümlədən Fransa prezidenti Emmanuel Makron və Böyük Britaniya baş naziri Kir Starmer Putinin birbaşa danışıqlara çağırışını "ilk, lakin kifayət etməyən" təklif kimi qiymətləndirib. Onlar qeyd-şərtsiz atəşkəsin danışıqlardan öncə baş verməli olduğunu vurğulayıb.
Hazırda Kiyev Kremlin təklifini rəsmi olaraq şərh etməyib, lakin tərəflər arasında gərginlik davam edir. ABŞ və Avropa İttifaqı Rusiyanın atəşkəslə bağlı razılığa gəlməyəcəyi təqdirdə yeni sanksiyaların tətbiq ediləcəyini istisna etmir.
ABŞ prezidenti Donald Tramp Putinin bəyanatına reaksiya verib. O, bunun "Rusiya və Ukrayna üçün potensial olaraq böyük bir gün" olduğunu yazıb və nəhayət müharibənin bitəcəyinə ümid etdiyini bildirib. "Bu sonsuz qanlı savaş nəhayət bitəndə xilas olacaq yüz minlərlə insan həyatını düşünün. Bu, tamamilə yeni və daha yaxşı bir dünya olacaq", - Tramp qeyd edib.
Bütün bu proseslərin fonunda 2022-ci ildə iflasa uğramış danışıqlar yenidən gündəmə gətirilir. Lakin müharibənin gedişi, hərbi cinayətlərin üzə çıxması və Ukraynanın Rusiya ilə danışıqlara faktiki qadağa qoyması əvvəlki dialoq cəhdlərinə nisbətən bugünkü vəziyyəti daha da mürəkkəbləşdirir. Putin isə vəziyyəti dəyişmək üçün "topun artıq Ukrayna tərəfində olduğunu" deyir. Danışıqların başlanıb-başlanmayacağı və nəticə verib-verməyəcəyi yaxın günlərdə bəlli olacaq.
