Tərtərdə baş vermiş yol-nəqliyyat hadisəsində 4 nəfər xəsarət alıb.
Sfera.az xəbər verir ki, qəza rayonun Sarıcalı kəndi ərazisində qeydə alınıb.
Hərəkətdə olan "Mercedes-Benz" markalı avtomobil qarşıdan gələn "Toyota Prius" markalı minik maşını ilə toqquşub.
Nəticədə "Mercedes-Benz" də olan Tərtər rayon Cəmilli kənd sakinləri, 1961-ci il təvəllüdlü Eldar Əli oğlu Şabanov, 1986-cı il təvəllüdlü Elməddin Eldəniz oğlu Şahbazov, 1963-cü il təvəllüdlü Elxan Əli oğlu Şabanov və onların həmkəndliləri, "Toyota" markalı avtomobildə olan 1955-ci il təvəllüdlü Məzahir Şəkəralı oğlu Əliaslanov müxtəlif dərəcəli bədən xəsarətləri alıblar.
Yaralılar təcili tibbi yardım avtomobili ilə Tərtər Rayon Mərkəzi Xəstəxanasına çatdırılıblar.
Tibbi Ərazi Bölmələrini İdarəetmə Birliyindən (TƏBİB) bildirilib ki, mayın 9-da saat 17 radələrində Tərtər rayonu Sarıcalı kəndi ərazisində yol-nəqliyyat hadisəsi səbəbilə xəsarət alan 4 nəfər (kişi cinsli) Tərtər Rayon Mərkəzi Xəstəxanasına hospitalizasiya olunub.
1963-cü il təvəllüdlü şəxsə döş qəfəsinin əzilməsi, yanaq və gicgah, çənə nahiyəsinin açıq yarası, 1986-cı il təvəllüdlü şəxsə baş beyinin silkələnməsi, 1961-ci il təvəllüdlü şəxsə yuxarı ətraf qurşağı və bazunun əzilməsi, baldırın digər və dəqiqləşdirilməmiş hissəsinin əzilməsi, əl barmağın dırnaq lövhəciyinin zədələnməsi ilə açıq yarası, 1955-ci il təvəllüdlü şəxsə isə sağ çiyinin çıxığı diaqnozu təyin edilib.
Hazırda hər birinin müalicəsi Təcili tibbi yardım şöbəsində davam etdirilir. Vəziyyətləri stabil olaraq qiymətləndirilir.
