Avropa İttifaqının (Aİ) diplomatiya rəhbəri Kaya Kallas bildirib ki, Rusiyaya qarşı 17-ci sanksiyalar paketi bir çox yeni məhdudiyyətləri, o cümlədən Aİ-nin Rusiya ilə əlaqələndirdiyi gəmilərə qarşı genişləndirilmiş tədbirləri əhatə edəcək.
NOCOMMENT.az xəbər verir ki, bu barədə TASS məlumat yayıb.
“Onun çoxlu yeni məhdudiyyətləri olacaq, siz “kölgə donanması” dediniz – bəli, orada olacaq”, – Avropa diplomatiyasının rəhbəri bildirib.
Mayın 7-də Amerikanın Bloomberg agentliyi xəbər verib ki, Aİ “Surqutneftegaz” şirkəti və VSK sığorta şirkətlərini 17-ci sanksiyalar paketinə daxil etmək niyyətindədir. Agentlik Avropa Komissiyasının təsdiq üçün Aİ ölkələrinə göndərdiyi sənədlərə istinadən yazır ki, 17-ci sanksiyalar paketi “sadələşdiriləcək”.
Yeni paketə 60 fiziki və hüquqi şəxsin, həmçinin 150 tankerin qara siyahıya salınması gözlənilir. Eyni zamanda Bloomberg qeyd edir ki, sanksiyalar paketi hər hansı yeni ticarət-iqtisadi tədbirləri nəzərdə tutmur.
