"Azərbaycan Prezidentinin Vyetnam Kommunist Partiyasının Baş katibi To Lam ilə görüşdə verdiyi bəyanat sadəcə ikitərəfli münasibətlərin protokol xarakterli təzahürü deyil, əksinə, konkret strateji istiqamətlər üzrə real əməkdaşlıq niyyətini ortaya qoyur", - bunu Sonxeber.az -a açıqlama verən politoloq Tural İsmayılov deyib:
"Bərpaolunan enerji sahəsində sərmayə qoymağa hazır olmaqla Azərbaycan əslində özünün "yaşıl enerji" gündəliyini təkcə daxildə deyil, beynəlxalq miqyasda da aktiv şəkildə təbliğ etdiyini göstərir. Bu həm iqtisadi qazanc, həm də siyasi nüfuz baxımından önəmlidir.
Vyetnam isə bu sahədə maraqlı və çevik bazardır – burada enerji tələbatı artır və yaşıl keçid prioritetdir. Azərbaycanın bu bazara daxil olması təkcə sərmayə deyil, texnoloji transfer və təcrübə mübadiləsi deməkdir.
Prezident Əliyevin toxunduğu digər mühüm istiqamət müdafiə sənayesidir. Bu sahə sözün əsl mənasında strateji və uzunmüddətli əməkdaşlığa əsaslanan bir platformadır.
Azərbaycanın müdafiə sənayesi son illərdə yerli istehsalı genişləndirib, Vyetnam isə bu sahədə yenilənməyə açıq sistemə malikdir.
Burada birgə müəssisələrin yaradılması fikri sırf iqtisadi deyil, həm də geosiyasi cəhətdən maraqlıdır – Asiyada və Cənubi Qafqazda yeni güc balanslarına təsir göstərə bilər.
Eyni zamanda beynəlxalq təşkilatlarda Azərbaycan və Vyetnamın eyni mövqedən çıxış etməsi – məsələn, Qoşulmama Hərəkatı çərçivəsində – iki ölkə arasında siyasi koordinasiyanın yüksək səviyyədə olduğunu sübut edir. Azərbaycanın Asiya istiqamətində diplomatik fəallığı artır, bu da onun çoxqütblü dünyada daha çevik və adaptiv mövqe tutmasına şərait yaradır.
Vyetnamla əməkdaşlıq, xüsusən texnologiya, sənaye və enerji kimi sahələrdə, Azərbaycanın iqtisadiyyatını daha da diversifikasiya etməyə imkan verir.
Qlobal səviyyədə baş verən geoiqtisadi və geosiyasi dəyişikliklər fonunda bu cür əməkdaşlıqlar strateji dəyər daşıyır.
Azərbaycan Cənubi Qafqazın enerji və nəqliyyat qovşağı olaraq artıq öz yerini möhkəmləndirib.
Bu potensialı indi Asiya bazarlarına da çıxarmaq planı yeni mərhələnin xəbərçisidir.
Bərpaolunan enerji üzrə əməkdaşlıq həm də Azərbaycanın "karbonsuzlaşdırma" hədəflərinə çatmaq üçün əlverişli mexanizmdir.
Azərbaycan bu sahədə təkcə investor yox, həm də təcrübə bölüşən tərəf kimi çıxış edə bilər.
Müdafiə sənayesi üzrə tərəfdaşlıq isə strateji baxımdan ciddi mesajdır – burada sülhü qorumaq üçün texnologiya və hazırlıq vacibdir.
Siyasi niyyət bəyanatı ilə iqtisadi təşəbbüslər arasında bu qədər uyum olan açıqlamalar nadir hallarda olur.
Səsləndirilən fikirlər uzun illər davam edə biləcək bir əməkdaşlıq platformasının ilkin konturlarıdır.
Bunlar nəinki iki ölkə arasında, ümumilikdə Asiya-Qafqaz oxunda yeni güc cizgilərini formalaşdıra bilər.
Azərbaycan artıq regional aktor olmaqla kifayətlənmir – o, qlobal partnyor olmaq yolundadır.
Bu görüş isə həmin yolun güclü addımlarından biridir.
Başqa sözlə: Bakıdan Hanoya uzanan bu diplomatik körpü gələcəyin texnologiyalarına və təhlükəsizlik sistemlərinə açılan qapıdır".
Çiçək Sadatova
