“Müasir müstəqil Azərbaycan dövlətinin qurucusu, Ulu Öndər Heydər Əliyevin həyat və fəaliyyəti bir fədakarlıq nümunəsidir. Hakimiyyətinin hər iki dövrünə nəzər salsaq görərik ki, ölkəmizin bu günü və gələcəyi üçün gördüyü işlər, atdığı addımlar ölçüyəgəlməzdir. Dahi şəxsiyyət Azərbaycanı hər zaman zirvələrdə görmək istəyirdi. Bu, Onun dövlətinə, xalqına bağlılığının, sevgisinin ən mühüm göstəricilərindən biridir. Azərbaycanlı olması ilə fəxr edən Ümummilli Lider Heydər Əliyev hər kəsə Vətəni sevməyi öyrətdi. Azərbaycançılıq ideologiyasının inkişafı və təbliği Ulu Öndərin hakimiyyətinin hər iki dövrünün əsas çağırışı oldu. Azərbaycanın ən çətin günlərində, 1993-cü ildə xalqın təkidli tələbi ilə hakimiyyətə qayıdan Ulu Öndər Heydər Əliyev bu çağırışı etdi ki, Azərbaycanın müstəqilliyini, suverenliyini qorumaq, əbədi etmək üçün harada yaşamasından asılı olmayaraq hər kəs bir amal - azərbaycançılıq ideologiyası ətrafında sıx birləşməlidir. Bu gün böyük qürur hissi ilə qeyd edirik ki, dünyaya səs salan tarixi Zəfərimizdə, ərazi bütövlüyümüzün və suverenliyimizin tam bərpa olunmasında bu birliyimizin, həmrəyliyimizin böyük rolu vardır. Ulu Öndər Heydər Əliyevin zəngin idarəçilik təcrübəsi, Vətəninə, xalqına sevgisi Azərbaycanı müstəqilliyinin bərpasının ilk illərində yaşadığı təhlükələrdən, faciələrdən xilas etdi. Azərbaycan həmin illərdə müstəqilliyini itirmək, bir dövlət olaraq dünya xəritəsindən silinmək təhlükəsi ilə üz-üzə qalmışdı. Belə çətin günlərdə Ulu Öndər Heydər Əliyev xalqının səsinə səs verdi, Naxçıvandan Bakıya gəldi. Bu gəliş xalqın sabaha ümidini bərpa etdi. Bütün ömrünü Azərbaycanın işıqlı gələcəyinə həsr edən, “Mənim üçün hər şeydən əziz mənim xalqımdır, mənim Vətənimdir, mənim torpağımdır” söyləyən Ümummilli Lider Heydər Əliyev Azərbaycanın müstəqilliyi üçün yaranan təhlükəni aradan qaldırdı. Bununla da ölkəmiz vətəndaş müharibəsindən və parçalanma təhlükəsindən xilas oldu. Xalqımızın nicatı və milli dövlətçiliyimizin xilası Ümummilli Lider Heydər Əliyevin 1993-cü ildə hakimiyyətə qayıdışından başladı”.
“İki sahil” xəbər verir ki, bu fikirləri Milli Məclisin deputatı Malik Həsənov bildirib.
Millət vəkili qeyd edib ki, Ulu Öndər Heydər Əliyev siyasi sabitliyin təminatçısı kimi nüfuz qazandı: “1991-1993-cü illərin xaosundan, anarxiyasından, vətəndaş qarşıdurmasından, Azərbaycanı parçalanmaqdan xilas edən Ümummilli Lider ölkənin gələcək inkişaf strategiyasını müəyyən etdi və onun həyata keçirilməsi üçün mühüm addımlar atdı. Ulu Öndər 1993-cü ilin oktyabrında Prezident seçildikdən sonra müstəqil Azərbaycanın hüquqi və siyasi-iqtisadi suverenliyinin təmin olunması prosesi əsaslı şəkildə sürətləndi. Dahi şəxsiyyət ilk növbədə, ölkədə ictimai-siyasi sabitliyin bərpası istiqamətində gərgin iş apardı. Ölkədəki qeyri-qanuni silahlı dəstələr zərərsizləşdirildi, respublikamızın sosial-iqtisadi yüksəlişinə yol açan ən mühüm amil kimi cəmiyyətdə ictimai-siyasi sabitlik bərqərar edildi. Azərbaycan qısa müddətdə sabitlik diyarına çevrildi. Ulu Öndər Heydər Əliyevin səyləri nəticəsində 1994-cü il may ayının 12-də Ermənistanla atəşkəs sazişinin imzalanması ölkədə sabitliyin yaradılmasında, torpaqlarımızın işğalının qarşısının alınmasında, eyni zamanda, digər sahələrin inkişafı istiqamətində mühüm addımların atılmasında əhəmiyyətli rol oynadı”.
Malik Həsənov bildirib ki, düşünülmüş və məqsədyönlü siyasəti ilə ölkədə sabitlik yaradan Ulu Öndər Heydər Əliyev “İqtisadiyyatı güclü olan dövlət hər şeyə qadirdir” tezisini irəli sürdü: “İqtisadiyyatın inkişafında neft amilinə xüsusi önəm verməsi Ümummilli Liderin uzaqgörən siyasətinin nəticəsi idi. Məhz bu gün də Azərbaycan xalqı Ümummilli Liderin müəllifi olduğu neft strategiyasının uğurlarını öz həyatında hiss edir. Ölkəmizin iqtisadi imkanları artır. “Əsrin müqaviləsi”ndən bu günədək reallığa çevrilən və icrası davam edən layihələrə diqqət yetirmək kifayətdir. Eyni zamanda, Azərbaycanın uğurlu enerji siyasəti beynəlxalq münasibətlər sistemində yeri və rolunun artmasında da öz sözünü deyir. 2017-ci ildə “Yeni əsrin müqaviləsi”nin imzalanması, 2020-ci ilin sonunda Cənub Qaz Dəhlizinin tam tərkibdə istifadəyə verilməsi də bunun bariz nümunəsidir. Azərbaycan yeni dostlar, tərəfdaşlar qazanır. Bu gün əminliklə qeyd eirik ki, Azərbaycan yalnız neft-qaz deyil, eyni zamanda, elektrik enerjisi ixracatçısıdır. Hazırkı dövrün əsas şağırışı yaşıl enerjiyə keçiddir. Ölkəmiz bu sahədə də böyük potensiala malik olduğunu ötən il dünyanı Bakıya toplayan COP29 iqlim konfransına yüksək səviyyədə ev sahibliyi edib mühüm nəticələrə imza atmaqla təsdiqlədi. COP29 yeni əməkdaşlıq formatlarının yaradılmasına yol açdı. Azərbaycan hər zaman əməkdaşlıq məkanı kimi tanınır, iştirakçısı və təşəbbüsçüsü olduğu enerji, nəqliyyat layihələri ilə dövlətlər, xalqlar arasında körpü roluna yeni əlavələr edir”.
Millət vəkili bildirib ki, Heydər Əliyev siyasətinin uğurlarını bir yazıda əhatə etmək mümkünsüzdür: “Tarixi Zəfərimiz, ərazi bütövlüyümüzün və suverenliyimizin tam bərpa edilməsi, Böyük Qayıdış Proqramının uğurlu icrası keçilən yolun təqdimatı, Heydər Əliyev siyasətinin Azərbaycana qazandırdığı uğurların ümumiləşdirilmiş ifadəsidir. Dahi şəxsiyyət Heydər Əliyevin 2003-cü ilin 1 oktyabr tarixində xalqa müraciəti Onun dövlətimiz, xalqımız qarşısında ən böyük xidmətlərindən biridir. Çünki bu müraciət Heydər Əliyev siyasətinin davamlılığını təmin etdi, Azərbaycanı Zəfərlərə qovuşdurdu. Son 21 ildən artıq dövrdə Ümummilli Liderin yaratdığı möhkəm təməl üzərində Azərbaycanı inkişaf etdirən, daha da möhkəmləndirən, beynəlxalq münasibətlər sistemində rolunu artıran, haqq səsini dünyaya çatdıran Prezident İlham Əliyev 2020-ci il 8 noyabr tarixində Qarabağın tacı Şuşanın işğaldan azad edilməsi müjdəsini xalqa çatdırarkən ata vəsiyyətini yerinə yetirdiyi üçün özünü xoşbəxt hiss etdiyini bildirdi.
Ulu Öndər Heydər Əliyevin ən böyük arzusu Şuşanı, Qarabağı və Zəngəzuru azad görmək idi. Bu gün Ümummilli Liderin ruhu şaddır. Müzəffər Ali Baş Komandan İlham Əliyevin rəhbərliyi ilə rəşadətli Ordumuz 30 ilin işğalına son qoydu, tarixi ədaləti bərpa etdi. Tarixi Zəfərimizdən üç il sonra suverenliyimiz tam bərpa edildi. Həyata keçirilən bir günlük antiterror tədbirləri nəticəsində suverenliyimizin bərpası ilə Azərbaycan yeni dövrə qədəm qoydu”.
Malik Həsənov vurğulayıb ki, işğaldan azad edilmiş bütün torpaqlarımızda üçrəngli bayrağımızın dalğalanması, Xankəndidə Zəfər paradının təşkili, müstəqillik tariximizdə ilk dəfə olaraq bütün ölkə ərazisini əhatə edən prezident, parlament və bələdiyyə seçkilərinin keçirilməsi, Qarabağın və Şərqi Zəngəzurun mərhələ-mərhələ sakinlərinə qovuşması, bir sözlə, sadalamaqla bitməyən uğurlarımız Heydər Əliyev siyasətinin təntənəsidir. 1993-cü ildən başlanan yol Azərbaycanı Zəfərlərdən-Zəfərə aparır. Xalqımız qürurlu, sevincli günlərini yaşayır. Nə qədər ki, müstəqil Azərbaycan dövləti, xalqı var, Heydər Əliyev ürəklərdə yaşayacaq, Onun gerçəkləşən ideyaları inkişaf yolumuzu işıqlandıracaq.
