ABŞ-ın Ticarət Palatası etiraf edib ki, on il əvvəl Çin hakimiyyəti tərəfindən qəbul edilmiş “Made in China 2025” proqramı özünü doğruldub. Böyük sərmayələr sayəsində Çin Qərblə texnoloji uçurumunu demək olar ki, tamamilə aradan qaldıra bilib.
“İki sahil” "www.uschamber.com" saytına istinadla xəbər verir ki, ABŞ hökumətinin Rhodium konsaltinq firması tərəfindən sifariş edilən hesabata görə, Çin dəmir yolu və elektrik avadanlıqları, tibbi cihazlar və bərpa olunan enerji məhsullarının idxalından daha az asılı vəziyyətə düşüb.
Bundan əlavə, Çin şirkətləri gəmiqayırma və robot texnikası kimi sektorlarda xarici şirkətlərin bazar payını qazanaraq qlobal bazarda daha rəqabətli olublar.
Rhodium direktorunun müavini və hesabatın aparıcı müəllifi Camille Boullenoit bildirib ki, indiki Çin 2015-ci ildəki Çindən çox fərqlidir və bu, böyük ölçüdə ölkənin misli görünməmiş dövlət maliyyələşdirməsinə əsaslanan sənaye sektoru siyasətləri ilə bağlıdır. Şübhə yoxdur ki, Çin fərqi aradan qaldırmağa və rəqabət qabiliyyətini artırmağa davam edəcək.
