Kral III Çarlzın oğlu Şahzadə Harrinin ailəsi ilə barışmaq istədiyini ifadə etdiyi müsahibənin əks-sədaları davam edir. “The Telegraph”ın Böyük Britaniya Sarayındakı mənbələri bildirdilər ki, kralın müşavirləri müsahibəni “verilən mesajın alınmadığını göstərən sübut” kimi görüblər.
Bildirilir ki, yüksək rütbəli saray rəsmisi müsahibədə Susseks hersoqu ilə sülh çağırışı və ailəsi ilə barışacağını düşünməsi ilə bağlı, “Harri reallıqla əlaqəni itirib. Son illər atası onunla telefonla danışmaqdan, mesajlarını almaqdan tamamilə imtina edir. Televiziyadakı bu anlar həm çarəsizliyini, həm də kral ailəsinə etdiyi hücumlara görə məsuliyyəti öz üzərinə götürməkdən imtina etməsini, qurumu sarsıtmaq səylərini və irqçilik və zorakılıqla bağlı pis iddialarını göstərir”, – deyib.
Çarlzın komandasının üzvü Harrinin mediaya müsahibələr verərək, atasını və qardaşını açıq şəkildə tənqid edərək, danışıqlara məcbur edə biləcəyini düşünməsinin “aldanış” adlandırıb. Əgər o, “yıxıb dağıtmaqla” ağıllı bir hərəkət etdiyini düşünürsə, axmaqlıq edir.
Kral ailəsi ilə yaşadığı problemlərdən sonra ABŞ-da yaşamağa başlayan Susseks hersoqu, ona verilən polis mühafizəsinin azaldılması qərarını verildiyi məhkəmə iclasından sonra BBC-yə açıqlama verib.
Şahzadə Harri, “Mənimlə bəzi ailə üzvlərim arasında çoxlu fikir ayrılıqları var idi”, – deyib.
40 yaşlı zadəgan kral ailəsini bağışladığını, lakin 2023-cü ildə nəşr olunan xatirələrinə görə qarşı tərəfin eyni münasibəti göstərmədiyini söylədi.
Şahzadə Harri, “Ailəmlə barışmaq istəyirəm. Mübarizəni davam etdirməyin mənası yoxdur. Həyat çox qiymətlidir. Atamın nə qədər vaxtı qaldığını bilmirəm, amma bu qoruma məsələsinə görə mənimlə danışmayacaq. Barışmaq yaxşı olardı”, – dedi.
Polis müdafiəsinin götürüldüyü və təhlükəsizlik səviyyəsinin aşağı salındığı məhkəmə iddiasının itirilməsindən kədərləndiyini ifadə edən Şahzadə Harri, “Hazırda ailəmi İngiltərəyə təhlükəsiz şəkildə gətirməyim mümkün deyil. Övladlarıma vətənimi göstərə bilməyəcəyim üçün kədərlənirəm”, – deyib.
Şahzadə Harri həmçinin bildirib ki, o, baş nazir Keir Starmer və daxili işlər naziri İvet Kuperdən qərarı nəzərdən keçirməyi xahiş edəcək.
Həyat yoldaşı ilə birlikdə ABŞ-a köçmək qərarına gəldikdən sonra müdafiə səviyyəsinin azaldığını xatırladan Şahzadə Harri bunun onların kral ailəsinə qayıtmasını təmin etmək üçün edildiyini bildirib.
Bu müsahibədən sonra Bukingem Sarayı məsələyə toxunaraq, “Bütün bu məsələlər məhkəmələr tərəfindən dəfələrlə və ciddi şəkildə araşdırılıb və hər dəfə də eyni nəticəyə gəlinib”, – deyə açıqlama verib.
