Əl Vətən: ABŞ qüvvələri Suriyanın şərqindəki Deyr əz-Zordakı iki hərbi bazadan geri çəkilir
BAKI. 3 may. TELEQRAF
Dəməşqdə çıxan “Əl Vətən” qəzeti xəbər verir ki, 200 hərbi maşından ibarət karvan cümə günü Suriyanın Deyr əz-Zor əyalətindəki ABŞ-ın iki hərbi bazasını tərk edərək Şimali İraqa istiqamət alıb.
Onun məlumatına görə, ABŞ-ın böyük bir qrup hərbi qulluqçusu və hərbi texnikası Suriyanın şərqindəki Əl Ömər neft yatağı və Koniko qaz yatağı ərazisindəki Amerika obyektlərindən çıxarılıb. İraqdakı Amerika bazalarına köçürülən hərbçilərin sayı dəqiqləşdirilməyib.
Aprelin 23-də ABŞ-ın Suriyanın Həsəkə əyalətindəki Əl-Cəbsə neft yatağının yaxınlığında yerləşən Əş Şəddadi bazasından qoşunların və hərbi texnikanın çıxarılmasına başlanılıb.
The New York Times xəbər verir ki, Amerikanın Suriyanın şimal-şərqindəki səkkiz əməliyyat bazasından üçü tezliklə bağlanacaq və hərbçilərin sayı 2200-dən 1400-ə enəcək.
2015-ci ildən ABŞ hərbi qulluqçuları Deyr əz-Zor, Rakka və Həsəkə əyalətlərindəki neft və qaz yataqları da daxil olmaqla, ölkə ərazisinin 25%-nə nəzarət edən Suriya Demokratik Qüvvələrinin (SDQ) kürd birləşmələrinə dəstək verib.
Martın 10-da Dəməşqdə Suriyanın keçid prezidenti Əhməd əl-Şaraa və SDF hərbi lideri Mazlum Abdi arasında kürd döyüşçülərin hökumət silahlı qüvvələrinin tərkibinə daxil edilməsinə dair saziş imzalanıb. Tərəflər kürdlərin nəzarətində olan bölgələrdəki bütün mülki və hərbi obyektlərin Dəməşqdəki yeni administrasiyanın nəzarətinə keçəcəyi barədə razılığa gəliblər.
