Güney Azərbaycan təmsilçisi "Traktor” İran Pro Liqasının qalibi olub.
Fanat.Az xəbər verir ki, Təbriz komandası tarixində ilk dəfə ölkə çempionu adını qazanıb.
“Al qurdlar” mövsümün sonuna 2 tur qalmış istəklərinə çatıblar. Xorvat mütəxəssis Draqan Skoçiçin baş məşqçisi olduğu komanda bu gün 28-ci turda səfərdə - Qəzvində yerli “Şəms Azar” üzərində 4:0 hesablı qələbə qazanıb və xalını 64-ə yüksəldib. Qolları Drozdek (2, 31-ci dəq.), Hosseinzadə (9) və Rikardo Alves (84-pen.) vurub.
Cənubi Azərbaycan klubunun ən yaxın izləyicisi olan “Sepahan” (İsfahan) isə öz meydanında 5-ci yerdə qərarlaşmış “Qohar”a uduzub - 1:2 və xalı 56-da qalıb.
Beləliklə, “Sepahan”ın bu məğlubiyyətindən sonra onunla “Traktor” arasında xal fərqi 8-ə yüksəlib. Bu isə o deməkdir ki, son 2 turun nəticəsindən asılı olmayaraq, “Traktor” hazırkı mövsümü lider kimi başa vuracaq.
Əlavə edək ki, bunadək “Traktor”un İran yüksək liqasında ən yaxşı nəticələri 3 dəfə 2-ci yeri, 2 dəfə isə 3-cü yeri tutmağı olmuşdu.
