“İran-Azərbaycan arasındakı ticarət dövriyyəsində son illər artım müşahidə olunur. 2024-cü ildə iki ölkə arasında ticarət dövriyyəsi 38% artıb. Rusiya, Çin və Türkiyə ilə müqayisədə İranla ticarət dövriyyəmiz kiçikdir. Təbii ki, trend bundan xəbər verir ki, artım dinamikası var. Hətta son beş ildə də İran-Azərbaycan arasındakı ticarət dövriyyəsinin bir neçə dəfə artmasını müşahidə edirik. Potensial böyükdür, lakin tam olaraq istifadə olunmur”.
Bu sözləri Pravda.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov deyib.
Deputatın sözlərinə görə, potensialdan daha geniş istifadə vacib məqamlardandır: “Sözsüz ki, bununla yanaşı imkanlar mövcuddur. İran Prezidenti Məsud Pezeşkianın Azərbaycana səfəri zamanı da həm infrastruktur layihələrində iştirak, həm nəqliyyat-loqistikada əməkdaşlıq və digər istiqamətlərdə potensial imkanlar müzakirə olundu, qiymətləndirildi. Güman olunur ki, Azərbaycan və İran arasında ticarət dövriyyəsində gələcəkdə növbəti artımları müşahidə edəcəyik. Bu isə xüsusən nəqliyyat-loqistika sahəsində daha sıx əməkdaşlığa imkanlar açacaq”.
Aytəkin Qardaşova
