Son 10 ildə Mərkəzi Asiya ölkələrinə göstərilən ümumi inkişafa rəsmi yardım 21 milyard dolları ötüb.
Hafta.az-ın RBC-ya istinadən yazdığına görə, bu ölkələrin siyahısına Qazaxıstan, Qırğızıstan, Özbəkistan, Tacikistan və Türkmənistan daxildir. Ancaq xəbərlərə görə, region ölkələrinin xarici yardımdan asılılığı getdikcə azalır.
Qaydar İnstitutunun ekspertləri hesab edirlər ki, ABŞ-ın xarici yardım proqramlarını azaltması Qərbin bu ölkələr üzərində təsirini zəiflədə bilsə də, Moskva, Pekin və Brüssel regionda iqtisadi təsirlərini artırmağa çalışacaq.
Rəsmi inkişaf yardımı 2024-cü ildə qlobal miqyasda 7 faiz azalıb. ABŞ, Almaniya, Böyük Britaniya, Yaponiya və Fransa ən böyük donorlar olaraq qalır. Lakin ABŞ prezidenti Donald Trampın Ukraynaya yardımı azaltmaq və USAİD proqramlarını bağlamaq planları Amerikanın xarici yardım büdcəsinin gələcəkdə daha da kiçilə biləcəyini göstərir.
Mərkəzi Asiya ölkələri arasında ən çox yardımı Özbəkistan və Qırğızıstan alır. Çin və Rusiya yeni layihələrlə, xüsusilə Qırğızıstan və Tacikistanda iqtisadi təsirlərini artırır, Çin isə Qazaxıstanda 100 MVt gücündə külək elektrik stansiyası layihəsinə sərmayə qoyub. Çinin regiona ümumi investisiya öhdəliyi 5,5 milyard dollara çatıb.
Müsabiqəyə Avropa İttifaqı da qoşulur. 2024-cü ilin aprelində keçirilən Aİ-Mərkəzi Asiya Sammitində Brüssel region ölkələri ilə “strateji tərəfdaşlıq” qurmaq məqsədilə 12 milyard avroluq yardım paketi elan edib. Bu paketə nəqliyyat, kritik minerallar, hidroelektrik və iqlim layihələri, həmçinin peyk internet infrastrukturu daxildir.
