Bakı, 28 aprel, AZƏRTAC
ABŞ-ın Yəmənin şimal-qərbindəki Saada şəhərində afrikalı miqrantların saxlanıldığı mərkəzə endirdiyi aviazərbələr nəticəsində azı 68 nəfər həlak olub, 47 nəfər isə yaralanıb.
AZƏRTAC xəbər verir ki, Al Masirah telekanalının məlumatına görə, həkimlər yaralananların əksəriyyətinin vəziyyətini ağır qiymətləndirir.
Xatırladaq ki, 2023-cü ildə Qəzza sektorunda döyüş əməliyyatları başlayandan sonra Yəmən İsrail ərazilərini atəşə tutacaqları və yəhudi dövlətinə gedən gəmilərin Qırmızı dəniz və Bab-əl-Məndəb boğazından keçməsinin qarşısını alacaqları barədə xəbərdarlıq edib.
Martın 15-də Prezident Donald Trampın göstərişi ilə ABŞ “Ənsar Allah” hərəkatının mövqelərinə kütləvi zərbələr endirib. Husilər isə buna cavab olaraq Qırmızı dənizin şimalında ABŞ-ın hərbi donanmasına raket və pilotsuz təyyarələr vasitəsilə silsilə hücumlar həyata keçirir.
