“Qarabağ” Premyer Liqanın XXXII turunda səfərdə “Sabah”la 1:1 heç-heçə edib. “Atlılar” bu görüşdən sonra sona 4 tur qalmış erkən çempionluqlarınl rəsmiləşdirib.
Ağdam təmsilçisinin aparıcı üzvlərindən olan Bəhlul Mustafazadə çempionluq haqda fikirlərini “Futbolpress.az”a açıqladı:
– Ümumiyyətlə, “Sabah”la oyunlarımız hər zaman gərgin keçir. Bu da həmin oyunlardan biri idi. Düşünürəm ki, maraqlı oyuna şahid olduq. Hər iki komandanın şansları var idi. Fikrimcə, azarkeşlər üçün də baxımlı matç alındı.
– Çempionluğu daha sakit qarşıladız. Özünüzü buna hazırlamışdız?
– Xeyr, elə deməzdim. Amma əvvəlcədən bilirdik ki, bir xal bizə kifayət edir. Bəlkə də onun rahatlığı var idi deyə, belə sakit tərzdə qeyd etdik.
– Kubokun final matçında daha aqressiv və istəkli “Sabah” sizi gözləyəcək…
– Əlbəttə, mən də onu gözləyirəm. Hər iki komanda kubokun finalına daha aqressiv və daha ciddi yanaşacaq.
Mirkamal Kazım
