BAKI, TurkicWorld
Yuxunun beyin inkişafına təsiri sübuta yetirildi
Kembric və Fudan universitetlərinin alimləri tərəfindən aparılan yeni tədqiqat, yeniyetmələrin erkən yataraq daha uzun müddət yatmasının beyin funksiyalarına müsbət təsir etdiyini ortaya qoyub.
Cell Reports jurnalında dərc edilən araşdırma 3200-dən çox yeniyetməni əhatə edib.
Tədqiqat zamanı iştirakçıların yuxu rejimi fitnes qolbaqları ilə izlənilib, onların MRT nəticələri və idrak testləri təhlil edilib. Məlum olub ki, daha erkən yatıb uzun müddət yatan yeniyetmələr yaddaş, düşünmə qabiliyyəti, söz ehtiyatı və problemlərin həlli üzrə testlərdə daha yüksək nəticələr əldə ediblər. Bu qrupda həmçinin beyin həcmi daha böyük və onun müxtəlif sahələrində funksiyalar daha güclü olub.
Alimlər bildiriblər ki, yuxu vaxtındakı cəmi 10–15 dəqiqəlik fərq belə, beynin inkişafına ciddi təsir göstərir. Onlar vurğulayırlar ki, bu fərq təhsil göstəricilərində böyük fərq yaratmasa da, beyin funksiyalarının güclənməsi baxımından mühüm əhəmiyyət kəsb edir.
Mütəxəssislər yeniyetmələrə axşam saatlarında telefon və kompüter istifadəsini məhdudlaşdırmağı, gün ərzində daha çox fiziki aktivliklə məşğul olmağı və sabit yuxu rejimi saxlamağı tövsiyə ediblər.
