Son illərdə ev telefonlarının istifadəsi ciddi şəkildə azalmağa başlayıb. Gündəlik həyatda mobil telefonların geniş yayılması və internetə qoşulma imkanlarının artması, ev telefonlarının mövqeyini zəiflədir. Bu dəyişiklik, xüsusilə inkişaf etmiş ölkələrdə nəzərə çarpır və insanların telefonla ünsiyyət üçün mobil telefonlara üstünlük verməsi ilə əlaqələndirilir.
Bir vaxtlar ev telefonları, xüsusilə şəhər ərazilərində ev təsərrüfatlarının təməl hissələrindən biri idi. Lakin bu günün texnoloji inkişafları, internet və mobil telefonların əlçatan olması ev telefonlarının əvvəlki mövqeyini itirməsinə səbəb olub.
Maraqlıdır ki, bir çoxumuz hər ay abunə haqqı ödəməyimizə baxmayaraq stasionar telefonlardan istifadə etmirik.
Mütəxəssislər, ev telefonlarının sıradan çıxmasının yalnız texnoloji inkişafla əlaqəli deyil, həm də iqtisadi amillərlə bağlı olduğunu vurğulayırlar. Ev telefonlarına abunə olmaq, xüsusilə inkişaf edən bazarlarda daha baha başa gələ bilər. Mobil telefonlar və internet zəngləri isə daha sərfəlidir və daha əlverişli seçimlər təqdim edir.
Ev telefonlarının sıradan çıxmaması, əlbəttə, bəzilərinə nostalji hissi yarada bilər, lakin texnologiyanın sürətli inkişafı və dəyişən istifadəçi vərdişləri göstərir ki, bu, yeni dövrün təbii bir inkişafıdır.
Mövzu ilə bağlı texnologiya məsələləri üzrə ekspert Fərid Kazımov Bizim.Media-ya açıqlamasında bildirib ki, smartfonların müxtəlif funksiyaları - sosial media tətbiqləri, mesajlaşma proqramları və video zəng xidmətləri - ev telefonlarını artıq lazımsız edir:
"İstifadəçilər bir cihazda bütün rabitə tələblərini qarşılamağa imkan verən bu telefonlardan hər zaman istifadə etməyə üstünlük verirlər. "Texnologiyaların bir xüsusiyyəti var ki, yeni gəldikdə köhnə sıradan çıxır.
Hazırda müasir mobilliyin inkişafı nəticəsində insanlar stasionar telefonların istifadəsini əhəmiyyətli dərəcədə azaldıb.
İstənilən halda simli telefonlar istifadəçilər üçün tələb olunan deyil. Təəssüflər olsun ki, biz ənənəvi olaraq bundan istifadə edirik. Mən də daxil olmaqla çoxumuz hər ay bu telefon üçün abunə haqqı ödəyirik, amma işlətmirik. Yadımda deyil ki, axırıncı dəfə nə vaxt istifadə etmişəm. Bu, da normal bir haldır. Ola bilsin ki, gələcəkdə də mobil telefonu əvəzləyəcək yeni bir texnologiya növü ortaya çıxacaq. Yeni nəsil artıq stasionar telefonlardan istifadə etmir".
Ayşən Rəhim, Bizim.Media
